सार्वजनिक यातायात: ‘न स्यानिटाइजर न दूरी, भाडा मात्र बढी’

कोरोना भाइरसको सङ्क्रमणको जोखिम कायमै रहँदा खुलेका सार्वजनिक यातायातमा आवतजावत गर्न  जोखिमपूर्ण बनेको छ ।यस्ता साधनमा  स्यानिटाइजर नराखिँदा तथा  दूरी कायम नगरिँदा जोखिम बढेको जनाइएको छ ।  सवारी साधनमा भाडामात्र बढीको रहेको छ ।

यातायात व्यवस्था विभागले तयार पारेको मापदण्डमा दुईजना बस्ने गरेको एक लहरमा एकजना बस्ने, सवारीमा अनिवार्य रुपमा स्यानिटाइजरको व्यवस्था हुनुपर्ने प्रावधानको व्यवस्था गरे पनि व्यवहारमा कार्यान्वयन हुन सकेको छैन ।

अनुगमन समेत नहुँदा यातायात व्यवसायीलाई ‘जे गरे पनि हुन्छ’ भन्ने भान परेको यात्रु प्रेमबहादुर थापाले बताए ।   “सार्वजनिक यातायातले पालना गर्नुपर्ने दूरी कायम गरेर क्षमताको ५० प्रतिशतमात्र यात्रु राख्ने र स्यानिटाइजरको व्यवस्था कार्यान्वयन भएन, पहिलेको भाडामा ५० प्रतिशत थपेर भाडा लिन पाउने नियममा भने बढाएर सके जति लिने गरेका छन्”, थापाले गुनासो गरे ।

बेनी–दरवाङ, बेनी–गलेश्वर र बेनी–बाग्लुङ समेत सवै मुख्य सडकमा प्रतिकिलोमिटर ७ रुपैयाँ र अन्य ग्रामिण सडकमा प्रति किमी १० रुपैयाँ भाडा तोकिएको छ । तर यहाँ ब्यवसायीले तीन गुणाबढी प्रति किलोमिटर २० रुपैयाँबढी असुली गरिरहेका छन । बेनी–गलेश्वर ३ किमी सडक खण्डमा यात्रुले ५० रुपैयाँ भाडा तिर्न बाध्य छन । सार्वजनिक यातायातमा न स्यानिटाईजर, न सामाजिक दुरी उल्टो सिमीत गाडीलाई मात्र महंगो भाडा असुलि गरिरहेका छन ।

विभागका महानिर्देशक गोगनबहादुर हमालले तोकेबमोजिम भए÷नभएको अनुगमन गर्ने जिम्मेवारी ट्राफिक प्रहरीलाई दिइएको दिएको बताउँछन । तर ट्राफिक प्रहरी सवारी साधनमा कोरोना सावधानीका उपाय नियमन त परको कुरा हाकाहाकी यात्रु माथी ठगी हुँदा रमिते बनेर हेर्ने गरेको छ । यी नै गाडीका चालक र मालिकहरु ट्राफिकका साथीबढी छन ।

नागरिक कोरोनाको जोखिम मोलेर बढी भाडा तिरी यात्रा गर्न बाध्य हुँदासमेत जनताको घर आँगनमा पुगेको भनिएको स्थानीय सरकार चुँक्कसम्म नबोलेको यात्रुको गुनासो छ । कतिपय जनप्रतिनिधीको त सार्वजनिक सवारी ब्यवसायी नै हुन । उनीहरु सार्वजनिक यातायातमा भाडा नियमनमा चासो राख्न नचाहेको स्थानियको गुनासो छ ।