कालीगण्डकीबाट अवैध उत्खनन भएको नदीजन्य पदार्थ गाउँपालिकाद्धारा जफत, कार्वाहीको जिम्मा भने गाउँकार्यापालिकालाई

अन्नपूर्ण गाउँपालिका, ६ घारको भिरकाटे स्थित कालीगण्डकी नदीबाट अवैध रुपमा उत्खनन गरेको गरिएको ४ सय ८० घनमिटर वालुवासमेत नदीजन्य पदार्थ गाउँपालिकाले जफत गर्ने भएको छ ।
नदीजन्य पदार्थ रातीरात चोरीबाटोबाट उत्खनन गर्ने कार्यमा कालीगण्डकी करिडोर बेनी–जोमसोम सडक आयोजनाको पहिलो प्याकेज निर्माण ठेक्का लिएको शर्मा युनाटेड र स्थानीय सागर बरुवाल संलग्न रहेको गाउँपालिकाले जनाएको छ ।
शनिवार गाउँपालिका अध्यक्ष डमबहादर गुर्वजाको अध्यक्षतामा अन्नपूर्ण संरक्षण क्षेत्र आयोजना, प्रहरी समेत सरोकारवालाको वैठकमा शर्मा युनाईटेडका सुपरभाईजर रमेश सुवेदी र स्थानीय युवा सागरले गल्ती स्वीकार गरेपछि उत्खनन भएको नदीजन्य पदार्थ गाउँपालिकाले जफत गरी बढीबढाउमा लिलामी गर्ने सहमति भएको प्रमुख प्रशासकीय अधिकृत नविन सुवेदीले बताए ।
‘गाउँपालिका अध्यक्षकै अध्यक्षतामा बसेको सरोकारवालाहरुको वैठकमा नदी उत्खनन गर्ने पक्षबाट गल्ती स्वीकार भैसकेको अवस्थामा वालुवा समेत नदीजन्य पदार्थ जफत गर्ने र आईतवार गाउँकार्यपालिकाको वैठकबसी दण्डजरिवाना तोक्ने निर्णय भएको छ’ प्रमुख प्रशासकीय अधिकृत सुवेदीले भने, ‘विभिन्न स्थानमा भण्डारण गरिउको जफत गरेको वालुवा छिट्टै गाउँपालिकाले लिलामी हुन्छ ।’
अन्नपूर्ण गाउँपालिका, ६ र ७ मा पर्ने भीरकाटेदेखी महभीर क्षेत्रमा अवैध रुपमा कालीगण्डकी नदीबाट नदीजन्य पदार्थ उत्खनन गरी विक्रि भैरहेको स्थानीयले भिडियोसहित गाउँपालिकामा उजुरी गरेपछि एक्याप, गाउँपालिका समेत सरोकारवालले स्थलगत अध्ययन गर्दा चोरीउत्खनन भएको भेटिएको थियो ।
असार १५ देखी तीन महिना वैधानिक रुपमा समेत नदीजन्य पदार्थ उत्खनन गर्न रोक लगाइएको छ । नीतिगत ब्यवस्था अनुसार नदीजन्य पदार्थ उत्खनन गर्न डोजरको समेत प्रयोग पाईदैन । गाउँपालिकाले प्रारम्भिक वातावरणीय प्रभाव मुल्याङ्कन (इआईए) गराई जिल्ला समवन्यय समितबाट पारित गराएपछि मात्र निश्चित मात्रा र प्रकृया पुर्‍याई नदीजन्य पदार्थ झिक्न पाईन्छ ।