अर्थमन्त्रीबाट डा. खतिवडा हट्ने निश्चित

करिब अढाई वर्षको कार्यकालमा सर्वाधिक चर्चा र विवादमा परेका अर्थमन्त्री डा. युवराज खतिवडा सरकारबाट विदा हुने लगभग निश्चित भएको छ।
. खतिवडाको राष्ट्रियसभा सदस्य पद भदौ तेश्रो सातादेखि जाँदैछ । उनको राष्ट्रियसभा सदस्यको रुपमा पदावधि नथपिएपछि स्वतः मन्त्री पदबाट विदा लिनुपर्नेछ ।
उनी र उनका निकटस्थहरुले यो पटक पनि प्रधानमन्त्री केपी शर्मा ओलीले राष्ट्रियसभा सदस्यको रुपमा निरन्तरता दिने आशा थियो । तर, डा. खतिवडाको पछिल्ला कामबाट प्रम ओली समेत सन्तुष्ट छैनन् । डा. खतिवडाकै कारण पार्टीभित्रको सन्तुलन समेत बिग्रिएको, पार्टीको छवि धूमिल भएपछि ओली समेत डा. खतिवडालाई विदा गर्ने पक्षमा छन् । यही कारण सरकारको सिफारिसमा राष्ट्रपतिले नियुक्त गर्नुपर्ने राष्ट्रियसभा सदस्यको एक रिक्त पदमा हालसम्म कसैलाई सिफारिस गरिएको छैन । यो पदमा पार्टीका उपाध्यक्ष बामदेव गौतमलाई लैजाने तयारी गरिएको छ ।
पछिल्लो समय ओलीको सदाशयता समेत आफूमाथि नरहेको र परिस्थिति फरक बनेपछि अर्थमन्त्री डा. खतिवडाले आफ्ना निकटस्थहरुसँग अब आफू मन्त्रीबाट विदा लिने तयारीमा रहेको बताएका छन् । उनले गत सातादेखि नै निकटस्थहरुसँगको भेटघाटमा आफू अब सरकारमा नरहने बताउन थालेका स्रोत दाबी गर्छ । यसले समेत अब डा. खतिवडाको बहिर्गमन सुनिश्चित बनेको स्रोत बताउँछ ।
राजनीतिक पृष्ठभूमिबाट नआएका डा. खतिवडा प्रशासनिक अनुभव र विज्ञताकै कारण एकैपटक मन्त्री बन्न पाउने भाग्यमानी पात्र समेत हुन् । तर, उनले आफ्नो कार्यकालमा आफूलाई प्रमाणित गर्न सकेनन् ।
दुईतिहाई नजिकको शक्तिशाली सरकारको अर्थमन्त्री रहेर पनि उनले अर्थतन्त्रमा प्रभावकारी परिवर्तन हुनसक्ने कुनै काम गर्न सकेनन् । बरु यसअघिका कमजोर सरकार जत्तिको समेत अर्थतन्त्रले प्रदर्शन गर्न सकेन । बरु, अवस्था झनै जर्जर बनेपछि उनको विज्ञताले काम नगरेको टिप्पणी हुँदै आएको छ ।
प्रधानमन्त्री ओली समेत पछिल्लो समयमा आफूले गरेको नयाँ प्रयोग असफल भएको बताउन थालेका छन् । गत साता बालुवाटारमा भएको पार्टीको एक छलफलमा उनले यो विषयमा खुलेरै कुरा गरेका स्रोत दाबी गर्छ ।
अर्थमन्त्रीको रुपमा डा. खतिवडा विदा हुने सुनिश्चित भएसँगै उनको व्यवस्थापनको विषयमा प्रधानमन्त्रीका प्रमुख सल्लाहकार विष्णु रिमालले तीव्र लविङ गरिरहेका छन् । रिमालले पार्टीभित्रको समीकरण मिलाउने क्रममा डा. खतिवडालाई विदा गर्नुपर्ने अवस्था आए पनि उनलाई प्रधानमन्त्रीको प्रमुख आर्थिक सल्लाहकार बनाउनुपर्ने विषयमा लविङ गरिरहेका बुझिएको छ । source-bizshala.com