आज मोहरात्रि

हिन्दू धर्ममा असाध्य महत्वपूर्ण मानिने चार रात्रीमध्ये श्रीकृष्ण जन्माष्टमीको रात्रि पनि एक हो । हिन्दू धर्ममा महाशिवरात्रि, महाअष्टमी (दशैं)को कालरात्रि, लक्ष्मीपूजा (तिहार)को शुखरात्रि र श्रीकृष्ण जन्माष्टमीको मोहरात्रि विशेष महत्वका छन् ।
धार्मिक मान्यताका आधारमा आजकै दिन द्वापर युगमा मामा कंसको कारागारमा थुनिएका वसुदेव र देवकीले भगवान श्रीकृष्णलाई मध्य रातमा जन्म दिएका थिए । सोही सम्झनामा कृष्णजन्माष्टमी मनाउने गरिएको हो । हिन्दू धर्मावलम्बीहरु आज भगवान श्रीकृष्ण जन्मेको विश्वासका आधारमा हर्षोल्लासपूर्वक कृष्ण जन्माष्टमी पर्व मनाउने गर्दछन् ।

श्रीकृष्णलाई हिन्दू धर्ममा विष्णुको लिलावतारका रुपमा लिइन्छ । भगवान रामको रुपमा अवतार लिँदा भगवान विष्णुले मर्यादाको पालना गरेको तथा कृष्णको रुपमा अवतार लिँदा लिला गरेको पौराणिक मान्यताका आधारमा उनलाई लिलावतारका रुपमा मानिने गरिएको हो ।