रौतहटका २ सहित कोरोना संक्रमितको संख्या ५४

मंगलबार रौतहटको वृन्दावन नगरपालिका ९ भुसहा र देवाही गोनाही नगरपालिका १ का २ जनामा कोरोना भाइरस संक्रमणको पुष्टि भएको छ । रौतहट जिल्ला स्वास्थ्य का प्रमुख महेश साहका अनुसार उनीहरु दुवै जनाको काठमाडौं टेकुस्थित राष्ट्रिय जनस्वास्थ्य प्रयोगशालामा गरिएको परीक्षणबाट कोरोना भाइरस पुष्टि भएको हो ।

संक्रमितमध्ये वृन्दावन भुसहाका २५ वर्षीय पुरुष भारतको कोलकाताबाट फर्केर चन्द्रपुरको क्वारेन्टाइनमा १४ दिन बसेर घर फर्किएका थिए । पछि उनको र्‍यापिड डाइग्नोस्टिक टेष्टमा नतिजा नेगेटभ देखिएपछि घर फर्काइएको थियो । कोरोना संक्रमण पुष्टि भएपछि ती युवकको खोजी सुरु भएको छ ।

स्थानीय देवाही गोनाही १ का संक्रमित ३५ वर्षीय पुरुष भने अहिले पनि क्वारेन्टाइनमै थिए । काठमाडौंबाट आएको टोलीले रौतहटका ८ क्वारेन्टाइनबाट ७ महिलासहित ८३ जनाको स्वाब संकलन गरेर लगेको थियो । सोही स्वाबमध्ये दुई जनामा पोजेटिभ देखिएको हो ।
रौतहटमा आज भेटिएका २ संक्रमितसहित नेपालमा संक्रमितको संख्या ५४ पुगेको छ । उपचारबाट निको भई घर फर्कनेको संख्या १६ रहेको छ ।