हिमपातले जनजिवन प्रभावित

शुक्रवार विहानदेखी परेको हिमपातले म्याग्दीको उपल्लो क्षेत्रको जनजीवन प्रभावित भएको छ । बाक्लो हिमपातले पर्यटकिय क्षेत्र पुनहिल, महरे, खोप्रामा हिउँ परेको छ ।
हिमपातबाट जिल्लाको सवैभन्दा दुर्गम वस्ती गुर्जा पैदलमार्गबाट विच्छेद भएको छ । पर्यटकहरु यात्रा रोकिएका छन । चिसोले बृद्धबृद्धा, बालबालिका र रोगीलाई सास्ती भएको छ ।

‘विहानै देखी हिउँ निरन्तर परिरहेको छ’ अन्नपूर्ण गाउँपालिका, ६ घोडेपानीका पर्यटन ब्यवसायी तारा पुनले भनिन, ‘अधिक चिसो छ । चिसोले खानेपानीको पाईप बन्द भएका छन ।’
उच्च क्षेत्रमा हिमपात भएको छ भने सदरमुकामसमेत तल्लो क्षेत्रमा भने अत्याधिक चिसो बढेको छ । लामो खडेरीपछि हिमपात भएकोले कृषकहरु भने खुशी भएका छन ।
‘ठिक्क समयमा पानी परेकोले गहुँ, केराउ तथा तोरीवालीलाई सिंचाई भएको छ । जता ततै खनेका सडकमा धुलो उडेर हैरान थियो, धुलो बसेको छ’ धौलागिरी गाउँपालिका, ७ ताकमका पुस्कर भण्डारीले भने, ‘चिसो बढेको छ । शनिवारसम्मै पानी परिरहे हिउँ नै खस्न सक्छ ।’

हिमपातपछि पोखरा–जोमसोम हवाई उडान अवरुद्ध भएको छ । जोमसोमदेखी तल म्याग्दीतर्फ झर्ने र उक्लने सवारी साधनहरु लेते क्षेत्रमा रोकिएका छन । हिमपातले चिसो अधिक बढेकोले स्थानियवासी समेत कर्मचारीहरु घर/कार्यालय भित्रै आगो बालेर बसेका छन ।
‘हिमपात भैरहेको छ । सामान्य हिमपातले यहाँको उत्पादनले बृद्धी हुन्छ । हिमपात हुनु राम्रो हो’ लोमन्थाङका कृषक साङ्वो गुरुङले भने, ‘गत वर्ष जस्तो चौरी, भेडा/च्याङ्ग्रा पुरिनेगरी बाक्लो हिउँ नपरे हुन्थ्यो ।’