गलेश्वर शिवालयमा शिवरात्रीको भेटी चार लाख ३३ हजार

बेनी नगरपालिका, ९ स्थित गलेश्वर शिवालय मन्दीरमा शिवरात्रीका दिन भक्तजनको चढाएको चार लाख ३३ हजार सात सय ७४ रुपैयाँ नगद भेटी चढाएका छन ।
शिवरात्रीका दिन विहानैदेखी साँझसम्म गलेश्वर शिवालय मन्दीरमा पुजाअर्चना गर्न आएका भक्तजनले चढाएको भेटी भोलीपल्ट विहिवार विहान स्थानीय अगुवा, आमा समुह, प्रहरी, पुजारी र कोषका पदाधिकारीको रोहोवरमा गणना गरिएको गलेश्वर क्षेत्र विकास कोषका कार्यालय सचिव रामबहादुर बानियाँले बताए ।
गलेश्वर शिवालय मन्दीरमा जिल्लाबाहेक बाग्लुङ्ग, मुस्ताङ्ग, पर्वत, कास्कींबाट समेत ठुलो संख्यामा भक्तजन आएका थिए । मन्दीरमा शिवरात्री, वालाचर्तुदशी, साउने सोमबार समेत दैनिक रुपमा आउने भक्तजनले बार्षिक ८० लाख बढी रुपैयाँ नगद भेटी चढाउने गरेका छन ।

गलेश्वर मन्दीरमा साउने सोमबार, शिवरात्री, वालाचर्तुदर्शी जस्ता विषेश पर्वमा हुने पुजा अर्चनाको भेटी भोलीपल्ट र बाँकी समय हरेक महिनाको अन्तिम दिन गणना गरी सोही दिन बैंकमा जम्मा गर्ने गरेको गलेश्वर शिवालय क्षेत्र विकास कोषले जनाएको छ ।
आम्दानीबाट मन्दीरका ब्यवस्थापन कर्मचारी, पुजारी, सरसफाई कर्मचारी, जेष्ठनागरिक आश्रमका भान्से, कालीगण्डकी वेदबिद्याश्रम संस्कृति विद्यालयमा खर्च गर्ने तथा केही रकम सामाजिक उत्तरदायित्व अर्न्तगत पदमार्ग निर्माण, खानेपानी, सडक वत्ति, सडकमा सिसी क्यामेरा जडान, धार्मिक पुस्तकालय निर्माण जस्ता सामाजिक काममा खर्च गर्ने गरेको र बचेको रकम कोषका विभिन्न बैंकमा रहेका खातामा जम्मा गर्ने गरिएको छ ।

‘शिवरात्री, वालाचर्तुदशी, साउने सोमबार र दैनिक दर्शन गर्न आउने भक्तजनले गलेशवर शिवालय मन्दीरमा चढाएको भेटीबाट बार्षिक ४०–४५ लाख र विभिन्न बैंकमा रहेको कोषको मुद्धती बचतबाट ब्याजगरी बार्षिक ८० लाखबढी आम्दानी हुने गरेको छ’ गलेश्वर क्षेत्र विकास कोषका अध्यक्ष माधव रेग्मीले भने, ‘पुजारी, कर्मचारी, मर्मतसंभार र सामाजिक उत्तरदायित्व तर्फगरी बार्षिक ३५–४० लाख खर्च हुने गरेको छ ।’