पहिरो झरेपछि बेनी–जोमसोम सडकमा यातायात अवरुद्ध

भारी बर्षापछि पहिरो झरेपछि बेनी–जोमसोम सडकको गलेश्वर–पोखरेबगर खण्डको दुई स्थानमा पहिरो झरेपछि यातायात अवरुद्ध भएको छ ।
सोमबार दिउँसो ३ बजेदेखी ६.३० बजेसम्म लगातार परेको वर्षापछि रघुगंगा गाउँपालिका, २ बैसरी छेउ सिरुवारी पहिरो र अन्नपूर्ण गाउँपालिका, ६ घारको महभीरमा पहिरो झरेपछि यातायात अवरुद्ध भएको जिल्ला प्रहरी कार्यालयले जनाएको छ ।
‘बेनी–जोमसोम सडकको वैसरी र महभीर दुई स्थानमा पहिरो झरेकोले साँझ ६.१५ बजेदेखी सोझो यातायात अवरुद्ध छ । यातायात खोल्ने प्रयास भैरहेपनि पहिरो झरीरहेको र सडक विभागसँग समन्वय भैरहेकोले संभव भएको छैन’ जिल्ला प्रहरी कार्यालय म्याग्दीका प्रमुख प्रहरी नायवउपरिक्षक भरत श्रेष्ठले भने, ‘राती भयो, पहिरो झरीरहेकोले बढी रिस्क नमोल्नु उपयुक्त हुने देखिएकोले यात्रुलाई सुरक्षित स्थानमा फर्कन भनेका छौं ।’
बेनी–जोमसोम सडकमा बैसरी विगत केही वर्षदेखी बर्षाहुँदा निरन्तर पहिरो खस्ने र यातायात अवरुद्ध हुने गरेको छ । महभीरमा भने गत साउनदेखी पहिरो खस्न थालेको हो । पहिरो सानो भएकोले ढुङ्गा खस्न रोकिएपछि र स्काभेटर उपलब्ध भए केही घन्टामै यातायात खुल्न सक्ने पनि प्रहरीले भनेको छ ।