रुप्सेको रुपमा पर्यटक मुग्ध

साँच्चै स्वर्ग आ’थ्यो रुप्से छहरामा…., आँखै चीत खा’थ्यो रुप्से छहरामा………..।

रुप्सेको रूपमा मुग्ध पोष्टराज चापागाईले मत्तकासिनी छन्दमा बखान गरेका छन ।
सडकमा दिनभर यात्रा गर्दा शरिर सिथिल बन्छ । अझ सडक किनाराको दृष्य उजाड भयो भने झन मन पनि विरक्त वन्छ । जथाभावी भौँतारिदा आनन्द हुँदैन । मनलाई नयाँपन, अनुभव चाहिन्छ । आँखाले देखेको दृष्य र मनले गरेको अनुभवले मनमा आनन्द मिल्छ । यात्रा रोमान्चक वन्छ ।

हिमालपारीको मुस्ताङ पुगेपछि तपाईको दृश्यमा सवै नयाँपन हुन्छ । तर कालीगण्डकी नदीसङ्गै लुकामारी गर्दै मुस्ताङ्ग तर्फ उक्लेको बेनी–जोमसोम सडक वारीपारीका झरनाले अप्ठ्यारो सडकमा यात्रालाई विर्साई दिन्छन । मनलाई आनन्द दिन्छन । बाहृै महिना झर्ने यी झरनाहरु बेनी–जोमसोम सडकका गहना हुन । बेनी–जोमसोम सडकमा सवैभन्दा आकर्षक झरना हो, रुप्से झरना ।

कालीगण्डकी नदीको कटानले बनाएको धौलागिरी र अन्नपुर्ण हिमश्रृखला विचको ६ हजार ९ सय ६७ मीटर गहिरो खोंच जस्लाई संसारकै गहिरो गल्छी ‘अन्धगल्छी’ मानिन्छ । त्यही अन्धगल्छीमा अवस्थित रुप्से झरनामा मोहित बन्ने कवि/कलाकारहरुले सयौं कविता र चित्र कोरेका छन ।

रुप्से छहरा नेपालको सुन्दर र मनमोहक झरना हो । २०३० सालमा नेपाल हुलाक टिकटमा प्रकाशित प्रशिद्ध रुप्से छहरा म्याग्दीको अन्नपूर्ण गाउँपालिका, ३ दानामा पर्छ । कुनै षोडसी युवतीले ओढेको च्यादर हावाले फर्र फर्र उडाउन खोजेेेेेे जस्तै उड्न खोजेको छ, रुप्से छहरा ।

कालीगण्डकी करिडोरमा अवस्थित अर्को सुन्दर झरना हो, अन्नपूर्ण गाउँपालिका, ४ नारच्याङ छहरा । नारच्याङ छहरामा साहसिक जलखेल क्यानुईङ्ग गर्न सकिन्छ । बाहृै महिना उत्रै र उस्तै देखिने नारच्याङ झरनामा साँझ सूर्यको अस्ताउँदो प्रकाश पर्दा सप्तरङ्गी इन्द्रेणी पर्दा अझ मनमोहक देखिन्छ ।

अन्नपूर्ण गापा, ७ महभीरमा पर्ने बेनी–जोमसोम सडकको तिप्ल्याङ्ग–भीरकाटे खण्डमा पर्ने महभीर झरना अर्को सुन्दर झरना हो । झरनालाई बेनी–जोमसोम चल्ने सवारी साधानबाट समेत सजिलै दृष्यावलोकन गर्न सकिन्छ ।