रुप्से होलिडेजले चार्टर्ड फ्लाइटमा २ सयबढी भियतनामी पर्यटक ल्याउने

ट्राभल एण्ड टुर कम्पनी रुप्से होलिडेजले २ सय बढी भियतनामी पर्यटकलाई चार्टर्ड फ्लाइटमा नेपाल ल्याउने भएको छ ।

भियतनामको हानोइबाट मे ११ र मे १८ मा गरी २ सय बढी बुद्धिष्ट धर्मावलम्बी चार्टर्ड फ्लाइटमा नेपाल आउन लागेको रुप्से होलिडेजका म्यानेजिङ डाइरेक्टर रमेश पराजुलीले बताए।

बुद्ध धर्मावलम्बीका साथै उच्च तहका भिक्षुहरुले नेपाल भ्रमण गर्न लागेको पराजुलीको भनाई छ ।  पर्यटकहरु भियतनामको हानोइबाट पहिलो चार्टर फ्लाइटमा मे ११ को बेलुका ६ बजे काठमाडौंमा अवतरण गर्नेछन् ।

बुद्धिष्ट पर्यटकहरु ५ रात होटल हायत प्यालेस काठमाडौंमा र अरु रात  जाम्बाला होटल, होटल हलेसी, भर्खरै खुलेको लेमज ट्रि प्रिमियर होटलमा रहनेछन् ।  उनीहरु कूल ७ रात र ८ दिनको प्याकेजमा नेपाल भ्रमण गर्नेछन् । ६ रात काठमाडौं र १ रात हलेसीमा बास बस्ने कार्यक्रम रहेको छ ।

यो नितान्त धार्मिक भ्रमण रहेको र यसबाट नेपाललाई बुद्ध धर्म मान्ने देश भनेर चिनाउँन ठूलो सहयोग पुग्ने रुप्से होलिडेजका म्यानेजिङ डाइरेक्टर पराजुलीले जानकारी दिएका छन् ।

बेनी नगरपालिका, १० पात्लेखेत घर भएका पराजुलीको ट्राभल एण्ड टुर कम्पनी रुप्से होलिडेज नेपाली पर्यटन उद्योगमा परिचित नाम हो ।