बाढीले पुरेकाे कागवेनीमा खन्दा एक करोड ६५ लाखबढी पैसा भेटियाे

हिमालपारीको मुस्ताङमा भारी बर्षपछि आएको बाढीले पुरेको कागवेनी बस्ती खोतल्दा पुरिएको एक करोड ६५ लाख बढी रुपैयाँ फेला परेको छ ।
प्रमुख जिल्ला अधिकारी अनुप केसीले दिएको जानकारी अनुसार उद्धारकर्ताले स्काभेटर र मानव जनशक्तिले पहिरो उत्खनन गर्दा पुरिएको प्रभु बैंक कागवेनी शाखाको ६५ लाख बढी र नेपाल इन्भेष्टमेन्ट मेगा वैंक कागवेनी शाखाको एक करोड ५ लाख ३२ हजार ९ सय ६४ रुपैयाँ नगद मौजाद रहेको ‘सेफ’ फेला परेको हो ।
थोरङ्लापास र मुक्तिनाथ क्षेत्रमा परेको अविरल बर्षापछि गत साउन २८ गते साँस स्थानीय कागखोलामा बाढी आउँदा वारागुङ मुक्तिक्षेत्र गाउँपालिका, ४ कागबेनी बस्ती पुरेको थियो ।
वारागुङ मुक्तिक्षेत्र गाउँपालिका प्रमुख प्रशासकीय अधिकृत होमबहादुर थापाका अनुसार कागखोलामा आएको बाढीले कागवेनीका २९ सर्वसाधारणका घर, ४ नम्बर वडा कार्यालय, इलाका प्रहरी चौकी पूर्ण रुपमा क्षति पुगेको थियो । जनशान्ती माध्यामिक विद्यालय भवन, मुक्तिनाथ अन्नक्षेत्र शन्तआश्रम धर्मशाला र १३ वना सर्वसाधारणको घरमा आंशिक क्षति पुगेको थियो । त्यस्तै, ९ वटा गोठसहित ३२ वटा गाई, घोडा र खच्चड पुरिएका थिए ।
बाढीको गेग्रान र लेदो वस्ती पसेपछि १६ वटा मोटरसाईकल, २ वटा जीप, कागवेनी स्थित श्राद्ध स्थल, श्रीकृष्ण मन्दीर, जोमसोम–कोरोला सडकको मोटरपुल, तिरी जोड्ने झोपु, ३ वटा काठेपुल र एउटा स्काभेटर पुरेको थियो । बाढीले पुर्‍याएको क्षतिको एकिन तथा विस्तृत विवरण संकलन भैरहेको वारागुङ मुक्तिक्षेत्र गाउँपालिकाले जनाएको छ ।
‘बाढीले पुरेको क्षेत्र उत्खनन गर्दा दुई वटा बैंकको नगद फेला परेको छ । बाढीले कति क्षती पुर्‍याएको छ भन्ने एकिन डाटा संकलन भैरहेकोले राहत वितरण प्रभावित भएको छ’ प्रमुख जिल्ला अधिकारी अनुप केसीले भने, ‘पालिकाले क्षतिको एकिन तथ्याङ्क संकलन गर्न सकेको छैन । घर पूर्ण क्षति भएका २९ जनाको नाम पनि प्राप्त नभएकोले प्रदेश सरकारले प्रति परिवार २५ हजारका दुरले पठाएको राहत पनि बुझाउन सकेका छैनौं ।’