म्याग्दीको भकिम्लीमा घरबास व्यवस्थापनसम्बन्धी तालिम सुरु

म्याग्दीको बेनी नगरपालिका–३, भकिम्लीको डोलेमा हिजो (आइतबार)देखि सिपमूलक घरवास पर्यटन व्यवस्थापन तालिम सुरु भएको छ ।

प्राविधिक शिक्षा तथा व्यावसायिक तालिम परिषद, धवलागिरि प्राविधिक शिक्षालय थासाङ गाउँपालिका–३, लेते, मुस्ताङको आयोजनामा तालिम सञ्चालन गरिएको हो ।

बेनपा–३, भकिम्ली वडा कार्यालय र धौलागिरि पर्यटन परिषद म्याग्दीको समन्वय तथा व्यवस्थापनमा १२ दिनसम्मको सिपमूलक घरवास अर्थात् होमस्टे तालिम सुरु भएको परिषदका अध्यक्ष अमर बानियाँले बताए ।

भकिम्लीकाे पर्यटकीय स्थल वेलढुङ्गालाइ लक्षित गरी होमस्टे कार्यक्रम सञ्चालन गरी स्थानीयको आयआर्जनमा वृद्धि गर्ने उद्देश्यसहित धवलागिरि प्राविधिक शिक्षालयको समन्वयमा पर्यटन परिषदमार्फत घरवास तालिम आयोजना गरिएको हाे ।

तालिमको उद्घाटनसत्र धौलागिरि पर्यटन परिषदका अध्यक्ष बानियाँको अध्यक्षता, वडास्तरीय महिला सञ्जाल भकिम्लीका अध्यक्ष पूर्णमाया जिसीको सञ्चालन र मुसुङडोले आधारभूत विद्यालयका प्रधानाध्यापक शेरबहादुर विकको स्वागतमा सम्पन्न भएको थियो । भकिम्लीका २० जना सहभागी तालिममा होमस्टे कार्यक्रमको विभिन्न विषयहरुमा सहजीकरण गरिने जनाइएको छ ।