बेनी–जोमसोम सडकका पहिरोको भाैगर्भिक तथा वायाेइन्जिनियरिङ अध्ययन सुरु

कालीगण्डकी करिडोर बेनी–जोमसोम–कोरोला सडक आयोजनाले बेनी–जोमसोम सडक खण्डमा रहेका विभिन्न १० वटा पहिरोको दिगो रोकथामकालागी अध्ययन थालेको छ ।
बेनी–जोमसोम सडक सुरक्षित गर्न आयोजनाले रघुगंगा गाउँपालिका, ३ गलेश्वरको पहिरो, सोही पालिकाको वैंसरी पहिरो, वेगखोला पहिरो, अन्नपूर्ण गाउँपालिका, ३ दाना क्षेत्रमा पर्ने जलथले पहिरो, खामभित्ता पहिरो, रुप्से झरना पहिरो, काप्रेगाउँको पहिरो समेत १० वटा पहिरोको भौर्गभिक तथा वायोइन्जिनियरिङ अध्ययन थालिएको हो ।
आयोजनाले १० वटा पहिरोको रोकथाम गर्न औषत ६ करोडको दरले ६० करोडबढी लागत लाग्ने पूर्वानुमान गरेको छ । यद्यपी पहिरोहरुको भौगर्भिक अध्ययन चलिरहेकोले लागत इष्टिमेट तथा डिपिआर भने निर्माण भैसेको छैन ।
‘बेनी–जोमसोम सडक पहिरो र कालीगण्डकी नदी कटानबाट पनि असुरक्षित छ । त्यसैले सडकको सुरक्षाकालागी सो खण्डमा पर्ने पहिरोहरुको भौगर्भिक तथा वायोइन्जिनियरिङ अध्ययन थालेका छौं’कालीगण्डकी करिडोर बेनी–जोमसोम–कोरोला सडक आयोजना प्रमुख जगत प्रजापतिले भने, ‘पहिरो रोकथामको डिपिआर र लागत इष्टिमेट तयार भैनसकेको भएपनि औषतमा एउटा पहिरो रोकथाममा ६ करोड खर्च लाग्ने अनुमान गरेका छौं ।’