पोखरा जहाज दुर्घटनामा अस्ताए पत्रकार त्रिभुवन पौडेल

नेपाल पत्रकार महासंघका केन्द्रीय सदस्य त्रिभुवन पौडेलको पोखरामा आज भएको जहाज दुर्घटनामा परी निधन भएको छ । आइतबार बिहान काठमाडौंबाट पोखराका लागि उडेको ७२ जना सवार यति एयरलाइन्सको जहाज अवतरण हुन लाग्दा सेती खोंचमा दुर्घटनामा परेको थियो । दुर्घटनामा परेका पौडेलको निधन भएको हो ।

पत्रकार पौडेल नेपाल पत्रकार महासंघको केन्द्रीय सदस्यमा थिए । महासंघको गण्डकी प्रदेश समितिको संस्थापक अध्यक्ष, कास्की शाखामा एकपटक उपाध्यक्ष र दुईपटक सचिवका रूपमा काम गरेका थिए । उनी प्रेस सेन्टर नेपालको केन्द्रिय उपाध्यक्ष र गण्डकी प्रदेश इन्चार्ज हुन ।
संगठनको केन्द्रीय कार्यालय काठमाडौंमा शनिबार भएको उपलव्ध पदाधिकारी बैठकमा सहभागि भई पोखरा फर्कने क्रममा दुर्घटनामा पर्नुभएका पौडेल पोखरा हटलाइन दैनिक पत्रिकाको सम्पादक, प्रकाशक पनि हुन ।

पर्वतको कुश्मा नगरपालीका १० आर्थर डाडाखर्कमा जन्मनु भएका त्रिभुवन पौडेलको निधनमा नेपाल पत्रकार महासंघ, प्रेस सेन्टर नेपाल लगायतले शोक विज्ञप्ती प्रकाशित गरि दुख व्यक्त गरेका छन् । प्रेस सेन्टर गण्डकी प्रदेश समितिका महासचिब सन्तोष गौतमद्धारा प्रकाशित विज्ञप्तीमा पौडेलको निधनले प्रेस सेन्टर र गण्डकी प्रदेशले मात्र नभई नेपाली पत्रकारिता क्षेत्रले अनुभवी, जुझारु र उर्जाशील युवा पत्रकार गुमाएको उल्लेख गरिएको छ ।