चीनबाट भदौभित्र थप ७६ लाख मात्रा खोप आउँदै

सरकारले फागुनसम्म कोरोना विरुद्धको ५ करोड २२ लाख मात्रा खोप ल्याउने प्रक्रियामा रहेको बताएको छ । स्वास्थ्य तथा जनसङ्ख्या मन्त्रालयले फागुनसम्म कोरोना विरुद्धको ५ करोड २२ लाख मात्रा खोप ल्याउने प्रक्रियामा रहेको जनाएको छ । मन्त्रालयका प्रवक्ता डा. कृष्ण पौडेलका अनुसार हालसम्म नेपालमा अनुदान र खरिद गरेर १ करोड ८ लाख ६० हजार १७० डोज प्राप्त गरेको छ ।

असोज मसान्तसम्म झन्डै एक तिहाइ जनसङ्ख्यालाई खोप दिइसक्ने योजना छ । १५ भदौभित्र चीनबाट थप ७६ लाख डोज कोभिडविरुद्धको खोप भेरोसेल आइपुग्ने भएको छ । ६० लाख मात्रा खरिद प्रक्रिया मार्फत र १६ लाख मात्रा अनुदानमा आउन लागेको स्वास्थ्य मन्त्रालय स्रोतले जनाएको छ ।

नन डिस्क्लोजर एग्रीमेन्ट(एन.डी.ए.) गरेको ६० लाख मात्रामध्ये ८ लाख २ भदौमा र अर्को ८ लाख डोज ४ भदौमा आइपुग्ने बताइएको छ । बाँकी ४४ लाख मात्रा अगस्ट महिना भित्रै पठाउने कम्पनीले प्रतिबद्धता जनाएको छ । यस्तै अनुदानमा दिने भनिएको १६ लाख डोज खोप पनि मध्य अगस्टसम्म आइपुग्ने चिनिया पक्षले बताएको छ ।

अहिलेसम्म २८ लाख ८८ हजार तीन सय ६० जनाले कोरोना विरुद्धको पूर्ण खोप लगाएका छन् । स्वास्थ्य मन्त्रालयका अनुसार १० लाख ८३ हजार चार सय तीन जनाले भेरोसिल खोपको पूर्ण मात्रा लगाएका छन् ।

नेपालमा हाल कोभिसिल्ड, भेरोसेल र जोन्सन एण्ड जोन्सनको खोप उपयोगमा आएको छ । अहिलेसम्म ४५ लाख ७० हजार ५५३ जनाले खोपको पहिलो मात्रा लगाएको स्वास्थ्य मन्त्रालयले जनाएको छ ।

सरकारले कुल जनसङ्ख्याको ७२ प्रतिशत अर्थात् २ करोड १७ लाख ५६ हजार ७६३ लाई कोभिड खोप लगाउने लक्ष्य लिएको छ । जसमध्ये हालसम्म २१ दशमलव १ प्रतिशतले पहिलो मात्रा र १३ दशमलव २८ प्रतिशतले दोस्रो मात्रा खोप पाएका हुन् । कोरोनाविरुद्ध खोप अभियानलाई निरन्तरता दिने स्वास्थ्य मन्त्रालयले जनाएको छ ।