कोरोना झन फैलदै, ग्रामिण भेगमा संक्रमणको चेनब्रेक गर्न अझै दुई साता लाग्न सक्ने

म्याग्दीमा बुधवार ७२ जनामा कोरोना पुष्टी भएको छ । २९ जना संक्रमण मुक्त भए ।
स्वास्थ्य कार्यालयका अनुसार जिल्लामा १ हजार ६६ जनामा कोरोना संक्रमण पुष्टी भएकोमा हाल ४ सय ५० जना सक्रिय संक्रमित छन । सोमबारसम्म संकलन गरी पिसिआर परिक्षणकालागी पोखरा स्थित प्रदेश प्रयोगशाला पठाएका ८ सय १३ स्वावको नमुनाको रिपोर्ट आउन बाँकी छन ।
‘सुरुमा सदरमुकाम बेनी, पोखरा, काठमाण्डौमै संक्रमित भै गाउँ पुगेका र उनीहरुको कन्ट्रयाक ट्रेसिङमा परेका संक्रमितहरुको वल्न रिजल्ट आईरहेको छ’ स्वास्थ्य कार्यालयका प्रमुख एकनारायण लम्सालले भने, ‘दोस्रो चरणको कन्ट्याक्ट ट्रेसिङमा परेका संक्रमित र पछिल्लो अवस्थाको संक्रमण देखिन अझै केही समय लाग्छ । अव कम्तीमा दुई हप्ता नभै ग्रामिण भेगमा संक्रमणको चेनब्रेक हुने अवस्था छैन ।’
गण्डकी प्रदेश स्वास्थ्य विभागले अभिलेख अनुसार म्याग्दीका २१ जनाको कोरोनाबाट मृत्यु भएको छ । पोखरा, काठमाण्डौ समेतका अस्पतालमा कोरोना संक्रमित भै मृत्यु भएका तर गृह जिल्ला म्याग्दी उल्लेख भएका ब्यक्तिसमेत जोड्दा २७ जनाको कोरोनाबाट मृत्यु भएको छ ।
२० वेड क्षमता भएको बेनी अस्पतालको आईसोलेसनमा बुधवार साँझसम्म २४ जना संक्रमितको उपचार भैरहेको छ । संक्रमित मध्य हाई प्रेसर अक्सिजन दिएर राखिएका तीन जना संक्रमितको अवस्था नाजुक छ ।
‘इर्मजेन्समा भर्ना भएका बाहेक आईसोलेसनमा २४ जना विरामीलाई अक्सिजनसहित उपचार भैरहेको छ’ बेनी अस्पतालका मेसु डा.जितेन्द्र कंडेलले भने, ‘तीन जना विरामीको अवस्था क्रिटिकल छ । विरामीले आर्थिक अवस्थाको कारण पोखरा सम्म जान नसक्ने बताएपछि हाईप्रेसर अक्सिजनको भरमा उपचार गरिरहेका छौं ।’
नयाँ भेरियन्ट सहितको कोरोना भाईरसको दोस्रो लहर संक्रमण समुदायमा भयावह नहुँदासम्म स्थानीय सरकार, प्रशासन र समुदाय सवैले वेवास्ता गर्दा दुर्गम ग्रामिण वस्तीसम्म कोरोना फैलिएको हो । सुरुमा सदरमुकाम र त्यसपछि बेनी नगरपालिका, ४ तातोपानीमा कोरोना संक्रमण देखिएको थियो ।
कोरोना संक्रमित बन्दा घट्ना लुकाउने प्रयास गर्दा थप फैलिएको मानिएको छ । कोरोनाबाट बच्न भन्दै सहरबाट गाउँ फर्केकाबाट कोरोना वस्तीमा पुगेको मानिएको छ । वस्तीमा भने विवाह, व्रतवन्ध, चौरासी पुजा, मृत्यु संस्कार जस्ता जमघटले कोरोनालाई घर–घर पुऱ्याएको ठहर जिल्ला कोरोना संकट ब्यवस्थापन केन्द्रले गरेको छ ।