महावीर पुनकाे नाममा २० भन्दा बढी नक्कली युट्युब च्यानल, पुन हैरान

राष्ट्रिय आविष्कार केन्द्रका अध्यक्ष महावीर पुन आफ्नो नामबाट नक्कली युट्युब च्यानलहरू खुलेकाे भन्दै चिन्तित बनेका छन् ।
पुनले फेक आईडीमार्फत आफ्ना भिडिओहरू अपलोड भइरहेको भन्दै फेसवुक मार्फत त्यस्ता नक्कली च्यानलहरूबाट नझुक्किन अनुरोध गरेका छन ।
पुनले सोमबार ‘Mahabir Pun Official’ नामक युट्युब च्यानल खोलेका थिए । आफ्नो युट्युब च्यानल खोलेको केही घण्टामै ‘Mahabir Pun Official’ नाममा २० भन्दा बढी नक्कली च्यानलहरू खुलेपछि उनले सर्वसाधारणलाई सचेत रहन आग्रह गरेका छन् ।
बुधबार सामाजिक सञ्जाल फेसबुकमा आफ्नो अनुभव शेयर गर्दै उनले लेखेका छन्, “नेपालमा रोजगारी नभएर पेट पाल्नकै लागि पैसा कमाउनु पर्ने बाध्यताले गर्दा नेपालीहरूले कतिसम्म फटाहा र अनैतिक काम गर्दा रहेछन् भन्ने एउटा सानो उदाहरण मैले देखेँ।”
‘Mahabir Pun Official’ नामक युट्युब च्यानलमा साढे १५ हजारभन्दा बढी सब्सक्राइबर भइसकेका छन् । च्यानलमा ज्ञानवर्द्धक तथा मनोरञ्जनात्मक सामग्रीहरू राख्ने योजना बनाएका छन् ।
पुनले आफ्नो नाममा खोलिएका फेक च्यानलहरूबाट बच्न आग्रह गर्दै आधिकारिक च्यानलमात्र फलो गर्न अनुरोध गरेका छन् ।