म्याग्दी क्याम्पसमा चैत ५ गते स्ववियु निर्वाचन हुँदै

त्रिभवन विश्व विद्यालयबाट सम्बन्धन प्राप्त म्याग्दी बहुमुखी क्याम्पसमा आगामी चैत ५ गते स्वतन्त्र विद्यार्थी युनियनको निर्वाचन हुने भएको छ ।
त्रिविबाट सम्बन्धन प्राप्त सामुदायीक प्रयत्नमा संञ्चालित म्याग्दी बहुमुखी क्याम्पस संञ्चालक समितिका अध्यक्ष दीपेन्द्र श्रेष्ठको अध्यक्षतामा बसेको वैठकले त्रिविको तालिका अनुसार नै स्ववियु निर्वाचन गराउने सर्वसम्मत निर्णय गरेको हो । त्रिविले आफ्ना आंगिक क्याम्पसमा चैत ५ गते स्ववियु निर्वाचन गराउने निर्वाचन तालिका प्रकाशित गरेको छ ।
क्याम्पस संञ्चालक समितिले स्ववियु निर्वाचन सम्पन्न गर्न सहायक क्याम्पस प्रमुख पशुपतिनाथ ढकालको संयोजकत्वमा टिकाराम सापकोटा, नारायण सुवेदी, प्रेम जिसी र तिलकुमारी राना सदस्य रहेको ५ सदस्यीय निर्वाचन समिति गठन गरेको छ ।
समितिले गत विहिवार (फागुन १५ गते) दिउँसो ४ बजेसम्म नयाँ भर्ना भएका विद्यार्थी र अन्तिम परिक्षामा सहभागी भैनसकेका सवै विद्यार्थी मतदाता हुने, निर्वाचन प्रयोजनकालागी अनिवार्य फोटोसहितको नयाँ परिचय पत्र जारी गरिने र मतदाता परिचय पक्र स्वयं ब्यत्तिले मात्र बुझ्न पर्ने ब्यवस्था गरेको छ ।
तोकिएको मापदण्ड अनुसार आगामी चैत ५ गते हुने स्ववियु निर्वाचनमा ८ सय २५ जना विद्यार्थी/मतदाताले विद्यार्थी नेता चयन गर्ने छन । त्रिवि स्ववियु निर्वाचन कार्यतालिका अनुसार फागुन १९ गते भोली विद्यार्थी संगठनहरुले आ–आफ्ना विद्यार्थी संगठन दर्ता गर्ने छन ।