म्याग्दी महोत्सवका पाहुनालाई टोड्केहिलमा निशुल्क वास

बेनीमा आयोजना गरिएको आसन्न म्याग्दी महोत्सवमा (पुस २८–८ माघ सम्म) आएका पाहुनालाई यहाँको एक रिसोर्टले एक रात निःशुल्क वास दिने भएको छ ।
बेनीको शिरमा बेनी नगरपालिका, मंगला र रघुगंगा गाउँपालिकाको संगमस्थल रहेको दुई हजार ४ सय ३० मिटर उचाईमा अवस्थित टोड्केहिल रिसोर्टले म्याग्दी महोत्सव अवधिभर महोत्सवमा सहभागी हुन आएका जो सुकै पाहुनाई पनि एक रात रिसोर्टमा वास (सुत्ने रुम/बेड चार्ज) निःशुल्क सुविधा दिने घोषणा गरेको हो ।
रिसोर्टका अध्यक्ष भीम शेरचनले एक भिडियो सन्देश जारी गरी म्याग्दी महोत्सव अवधिभर टोड्के स्थित टोड्केहिल रिसोर्ट पुग्ने पाहुनालाई पुगेको खण्डमा बास सुविधा निशुल्क दिने भनेको हो । धौलागिरी सेन्चुरी पदमार्गमा पर्ने टोड्केमा ०७५ देखी सुविस्तासहित ३० र एडजस्टगरी ४५ जना, टेन्टमा २५ जनासमेत एक सय पाहुना राख्न सक्ने क्षमताको टोड्केहिल रिसोर्ट खुलेको थियो । ७ जनाको लगानीबाट सुरु गरेको रिसोर्टमा अहिले ३५ जना शेयर सदस्य छन ।
‘हामीले म्याग्दी महोत्सवको अवसरमा आएका पाहुनालाई टोड्के भ्यूपोईन्टमा आर्कषण गर्न रिसोर्ट पुग्ने पाहुनालाई निशुल्क वास (वेड/रुम चार्ज फ्रि) ब्यवस्था गरेका हौं’ टोड्केहिल रिसोर्टका अध्यक्ष भीम शेरचनले भने, ‘रिसोर्टको प्याकेजले जिल्लाको पर्यटन प्रर्वद्धनमा योगदान पुर्‍याउने विश्वास लिएका छौं । टोड्के आउने गाडी ब्यवस्थापनमा सहजीकरण गरेका छौं ।’
बैंकर्स, एनजिओ/आईएनजिओ, कलेजका विद्यार्थी, प्रवासी नेपाली/प्रवासी म्याग्देली, लायन्स, जेसिज, ब्यवसायी, धर्मगुरुहरु र बाहृय पर्यटकलाई लक्षितगरी खुलेको रिसोर्टले ‘अफसिजन’ उपयोग गर्न म्याग्दी महोत्सवको अवसरमा वास (रुम चार्ज) छुट प्याकेज ल्याएको हो ।
धौलागिरी एवं अन्नपूर्ण हिमश्रृखलाका १६ वटा हिमाल दृष्यावलोकन गर्ने सकिने सदरमुकामबाट सवैभन्दा नजिकको गन्तब्य टोड्केलाई सरकारले प्रर्यटकीय गन्तब्यमा सूचिकृत गरेको छ । टोड्के धुरीबाट कालीगण्डकी, म्याग्दी र रघुगंगा नदी किनाराका फाँट, जिल्लाका ४५ वटा मध्य ३६ वडाको भुभाग देख्न सकिन्छ ।
टोड्के पुग्न बेनीबाट फरक–फरक ५ वटा कच्ची मोटरबाटो जोडिएको छ । बेनीबाट जीप वा निजी सवारी साधनबाट दुई घन्टामा पुग्न सकिन्छ । साईकलिङ्ग गर्न चाहनेले बेनीबाट अथुङ्गे, तोरीपानी, पात्लेखेत, वाखेतहुँदै टोड्के उक्लेर र पूर्णगाउँ, कुहुँ, ताराखेत, तातोपानीहुँदै फर्कन उपयुक्त छ । टोड्केधुरी धौलागिरी सेन्चुरी पदमार्गको प्रवेश मार्गमा अवस्थित छ ।
दाउरा प्रश्स्त पाईने भएकोले ‘क्याम्प फायर’ रुचाउने पर्यटककालागी टोड्के थप उपयुक्त छ । लोकल कुखुरा वा खशीलाई क्याम्प फायरमा पोल्दै कोदोको रैथाने तीनपानीमा रुचि राख्नेकालागी टेन्ट सहित बस्न सकिन्छ ।
टोड्केमा मृग, घोरल, बाँदर, चितुवा, काजिल, फत्रास लगाएतका वन्यजन्तु एवं पंक्षिहरु अवलोकन गर्न पाईन्छ । टोड्के पुग्ने पदमार्गमा पर्ने तारीपानीमा टिमुरको ब्यवसायीक खेती हेर्न सकिन्छ । टोड्केमा हिन्दुहरुको पवित्र तिर्थस्थल प्युठानको स्वर्गद्वारीको शाखा आश्रम छ ।