तयारीविना अध्यागमन कार्यालय उद्घाटन, भोलीपल्टैबाट बन्द

मन्त्रीको शिलालेखमा नाम राख्ने हतारोहुँदा तयारी विना उद्घाटन गरिएको लोमन्थाङ गाउँपालिका, १ नेचुङ स्थित कोरला अध्यागमन कार्यालय भोलीपल्ट देखी नै बन्द गरिएको छ ।
कात्तिक १४ गते विहान गृहमन्त्री रमेश लेखक हेलिकोप्टरमा कोरला पुगेर अध्यागमन कार्यालय उद्घाटन गरेको भोलीपल्टदेखी तिहान विदासँगै बन्द गरिएको कोरला अध्यागमन कार्यालय त्यसपछि खुलेको छैन । अध्यागमन कार्यालयमा खटाईएका कर्मचारीहरु चिसो वढेकोले अव बैशाखबाट कार्यालय खोल्ने भन्दै घर फर्केका थिए ।
‘अहिले कोरला स्थित नेपाली भन्सार कार्यालय बन्द छ । मन्त्रीले उद्घाटनगरी हेलिकोप्टरमा फर्केपछि कर्मचारीहरुले पनि कार्यालयको ढोकामा चावी लगाएर अव वैशाखमा फर्किन्छौ भन्दै घर फर्केका हुन’ उपल्लो मुस्ताङको लोघेकर–दामोदरकुण्ड गाउँपालिका अध्यक्ष लोप्साङ छोप्पेल विष्टले भने, ‘उता (चिनियाँ) भन्सार जाडो/गर्मीको निहुँमा कहिल्यै वन्द हुँदैन, यता हाम्रो यस्तै हो ।’
समुद्र सतहदेखी ४ हजार ६ सय ५० मिटर उचाईमा अवस्थित कोरला नाका स्थित अध्यागमन कार्यालयमा सरकारले १ जना अध्यागमन अधिकृत, २ जना बरिष्ठ अध्यागमन सहायक, १ जना सहायक लेखापाल, २ जना सहायक कम्प्युटर अपरेटर र २ जना कार्यालय सहयोगीसमेत ८ जनाको दरवन्दी कायम गरी कर्मचारी खटाएको थियो ।
कोरला स्थित अध्यागमन कार्यालय मात्र होईन नाकादेखी १२ किलोमिटर तल नेचुङमा शसस्त्र प्रहरीको विओपीसँगै रहेको भन्सार कार्यालय पनि अहिले बन्द छ । कोरला नाकास्थित नेपाली अध्यागमन/भन्सार कार्यालय बन्द गरिएपनि चिनियाँ अध्यागमन कार्यालय खुल्ला रहेकोले नेपाली ब्यापारी सीमापार तिब्बत पुगेर दैनिक उपभोग्य र केही ब्यापारकालागी सामान ल्याउने गरेका छन ।

‘माथी (कोरलानाका)मा अधिक चिसो छ । तलका कर्मचारीलाई माथी चिसोसँग एडजस्ट गर्न समस्या भएकोले अध्यागमन कार्यालय उद्घाटनमा आएका कर्मचारी फर्केका छन । अध्यागमन विभाग अहिले कर्मचारी ब्यवस्थापनमै लागेको वुझेको छु’ मुस्ताङका प्रमुख अधिकारी विष्णुप्रसाद भुषालले भने, ‘हिउँदका चिसो याममा तल लोमन्थाङ वस्ने र दिउँसो माथी कोरला गै काम गर्नेगरी साधनश्रोतसहित कर्मचारी पपठाउने कुरा छ । अर्न्तराष्ट्रिय नाका भएकोले बैशाखसम्मै त कसरी बन्द गर्न मिल्ला र ?’
कोरोला नाका ब्यवसायीक रुपमा खुल्ला भएसँगै उपल्लो मुस्ताङका लोमन्थाङ र लोघेकरदामोदर कुण्ड गाउँपालिकाका बासिन्दाले परिचय पत्रका आधारमा तिब्बत तर्फ ३० किलोमिटर परसम्मका बजारमा जान/आउन छुट पाउने ब्यवस्था अनुसार सीमापार गरी सामान ल्याउने गरेका हुन ।
त्यसैविच चीनले कोरला नाकाको औपचारिक खुल्ला भएको अवसरमा बार्षिकउत्सव मनाएको छ । कात्तिक २८ गते मुस्ताङ स्थित प्रमुख जिल्ला अधिकारी, सुरक्षा अधिकारी र जनप्रतिनिधीहरुलाई तिब्बतको झोम्बा काउन्ट्रीमा आमन्त्रणगरी वार्षिकोत्सव मनाएको थियो ।
गत वर्ष कात्तिक २८ गते कोरोला नाकाको चीनको सिगात्से प्रान्तको झोम्वा काउन्ट्रीका मेजेष्ट्री नुर्वु छिरिङ र नेपालको गण्डकी प्रदेश अर्न्तगत मुस्ताङ जिल्लाका प्रमुख जिल्ला अधिकारी जनकराज पन्तले उद्घाटन गरेका थिए ।
गण्डकी प्रदेशको नवलपरासीको गैंडाकोटबाट ४ सय ३५ किमी लामो कालीगण्डकी करिडोर सडक कोरोला नाकामा पुगेपछि तिब्बतको झोङ्वा काउन्ट्री हुँदै २० किमीपर सिगात्सेवाट आएको ‘चाईना नेसनल हाईवे २१९’ सँग जोडिन्छ । मुस्ताङको चीनको स्वसाशित तिब्बतसँग १८–३३ सम्म १६ वटा सीमास्तम्भले १३४.१६ किलोमिटर अर्न्तरष्ट्रिय सीमा जोडिएको छ ।
कोरोला नाकामा चीनियाँ अध्यागमनको आमने–सामने हुनेगरी भन्सार प्रयोजनका पूर्वाधार निर्माण गर्न एक हजार रोपनी जग्गा अधिग्रहण गरिएको भएपनि पूर्वाधार भने बनेका छैनन ।
नेपाल र चीनलाई सडक सम्पर्कले जोड्ने केरुङ र तातोपानी नाकापछि कोरोला तेस्रो नाका हो । नेपाल–चीन विच सात वटा द्विदेशीय ब्यापारिक नाकाहरु (ताप्लेजुङको अलाङचुङगोला, संखुवासभाको किमाथाङ्का, दोलखाको लामाबगर, गोर्खाको लार्के, हुम्लाको यारी र मुगु) पनि छिट्टै खोल्ने सहमति छ ।