बेनीमा तेस्रो परम्परागत ताराखेल प्रतियोगिता सुरु

सदरमुकाम बेनीमा शुक्रवारदेखी तेस्रो गण्डकी प्रदेश स्तरिय परम्परागत ताराखेल प्रतियोगिता सुरु भएको छ ।
थकाली समाज घर बेनीको ताराखेल मैदानमा सुरु प्रतियोगिताको म्याग्दीबाट गण्डकी प्रदेश सभा सदस्य विमला गौचनले एक समारोह विच उद्घाटन गरिन ।

जिल्ला खेलकुद विकास समिति म्याग्दीको संयोजन र गण्डकी प्रदेश खेलकुद परिषदको आयोजनामा सुरु भएको प्रतियोगितामा म्याग्दी, मुस्ताङ, बाग्लुङ, पर्वत, कास्की र मनाङ जिल्लाका खेलाडीहरु प्रतिस्पर्धा गर्दै छन ।
परम्परागत रुपमा खेलिने ताराखेल लोकप्रिय रहेका प्रदेशका जिल्लाहरुमा बर्षेनी आलोपालो आयोजना हुने प्रतियोगिताको उद्घाटन कार्यक्रममा प्रमुख जिल्ला अधिकारी लक्ष्मण ढकाल, गण्डकी प्रदेश खेलकुद परिषदका सदस्य योगेन्द्रमान शेरचन र जिल्ला खेलकुद विकास समिति म्याग्दीका अध्यक्ष दिनेश केसीले खेलकुद र ताराखेलको महत्व बारे चर्चा गरे ।