उपल्लो मुस्ताङमा विमानस्थल बनाउने योजना कागजमै सिमित

हिमालपारीको जिल्ला मुस्ताङको उपल्लो थलोमा विमानस्थल बनाउने योजना कागजमै सिमित छ ।
संस्कृति पर्यटन तथा नागरिक उड्ययन मन्त्रालयले आइएफआइडी कन्सल्टेन्सी मार्फत उपल्लो मुस्ताङको लोघेकर दामोदरकुण्ड गाउँपालिका, १ चराङगाउँको तल्लो फाँटमा विमान स्थलको डिपिआर पनि बनाएको थियो । तर चार हजार मिटर उचाईमा प्रस्तावित उक्त विमानस्थल बनाउने योजना र डिपिआर मन्त्रालयमा थन्किएको छ ।
०७६ कात्तिक ११ गते तत्कालिन संस्कृति पर्यटन तथा नागरिक उड्ययन मन्त्री रविन्द्र अधिकारी चराङ पुगेर विमान स्थल निर्माण प्रकृया अगाडी बढाउने प्रतिवद्धता जनाएका थिए । ०७५ सालमा सरकारले चराङमा विमानस्थल बनाउन प्रारम्भिक अध्ययन गरेको थियो । मन्त्री अधिकारीकै निर्दैशनमा प्राधिकरणले आइएफआइडी कन्सल्टेन्सीका सिभिल इन्जिनिय नरेश सिवाकोटी र प्रकाश श्रेष्ठलाई चराङ पठाई विमानस्थलको डिपिआर बनाउन लगाएको थियो ।
‘मुस्ताङको उपल्लो थलो चराङमा विमानस्थल बनाउन धेरै प्रकृया पुरा भएको हो । प्राविधिकले डिपिआर समेत बनाएका हुन । तर त्यसपछि योजना र डिपिआर कता पुग्यो, अज्ञात छौं’ गण्डकी प्रदेश सभामा मुस्ताङ क्षेत्र का तत्कालिन सदस्य इन्द्रधारा विष्टले भने, ‘हाइअल्टिच्युटको कुरा उठेको हो । उपल्लो मुस्ताङमा विभिन्न इस्युले गर्दा विमानस्थल बन्ने कुरा प्रभावित भएको छ ।’