आज:  | Sun, 03, Jul, 2022

विपदमा मेयर र आमा समुहसँग उपमेयर

२४ जेष्ठ २०७९, मंगलवार २०:०० मा प्रकाशित (3 हप्ता अघि)
पुनहिल संवाददाता

बेनी नगरपालिकाकाे पहिलाे कार्यपालिका वैठकले मेयर र उपमेयरकाे नाम जाेडिएका छुट्टाछुट्टै दुइ वटा कार्यक्रमसहित विभिन्न निर्णयहरू सार्वजनिक गरेकाे छ । 

बेनी नगर कार्यपालिकाकाे पहिलाे वैठकले  ‘विपदमा मेयर’ र ‘आमा समुहसँग उपमेयर’ कार्यक्रम संञ्चालन गर्ने निर्णय गरेको हो । त्यसैगरी वैठकले  मजदुर डेस्क र मजदुर सहायता कोष स्थापना गर्ने पनि निर्णय गरेकाे जनाएकाे छ । नगर कार्यपालिका बैठकको निर्णय सार्वजनिक गर्न आयोजित पत्रकार सम्मेलनमा प्रवक्ता रमेशकुमार श्रेष्ठले भने, बैठकले सामुदायिक विद्यालयको शैक्षिक गुणस्तर अभिबृद्धि गरि विद्यार्थी संख्या समेत अभिबृद्धिका लागि आबश्यक सुझाब सहितको प्रतिवेदन पेश गर्न शिक्षा अधिकृत कमलप्रसाद ढकाल संयोजकत्वमा ७ सदस्यीय कार्यदल समेत गठन गर्ने निर्णय गरेको छ ।

त्यस्तै नगरप्रहरी सञ्चालन तथा व्यवस्थापन कार्यविधि र रुख कटान सम्बन्धी कार्यविधि निर्माण गर्ने , नगरपालिकाको बिषयगत समितिहरुलाई समेत पूर्णता दिईएको छ । 

पदमबहादुर पुनको संयोजकत्वमा आर्थिक विकास, चक्रबहादुर केसीको संयोजकत्वमा सामाजिक विकास, कृष्ण बहादुर बानियाँको संयोजकत्वमा पूर्वांधार विकास, अणबहादुर खड्काको संयोजकत्वमा वन वातावरण तथा विपद् व्यवस्थापन, उत्तम कुमार कर्माचार्यको संयोजकत्वमा सुशासन तथा संस्थागत विकास समिति गठन गरिएको छ ।