मुस्ताङकाे थासाङ क्षेत्रमा तारायएरको ट्वीनअटर विमान वेपत्ता, बाक्लो हुस्सुको कारण खोजी कार्य प्रभावित

मुस्ताङकाे थासाङ क्षेत्रमा वेपत्ता विमान बाक्लो हुस्सु लागेको र पानी निरन्तर परिरहेकोले वेपत्ता ट्वीनअटर विमान खोज्न समस्या भएको छ ।
पोखराबाट २२ जना यात्रु बोकेर जोमसोमकालागी उडेको तारा यएरको ९ एमएईटी ट्वीनअटर विमान मुस्ताङको घाँसा, लेते आसपासमा विमान खसेको अनुमान छ ।
पोखराबाट विहान ९.५५ बजे उडेको विमान म्याग्दी खण्डमा पर्ने वफरजोन क्रसगरेपछि सम्पर्क विहीन भएकोले घाँसा वा लेते आसपास विमान खसेको अनुमान गरिएको हो । थासाङ गापा, १ घाँसाका विक्रम गौचनका अनुसार विमान लेतेको पारी टिटी ताल र निलगिरी हिमालमुनीको मार्चेलेकसम्म आवाज सुनिएको खवर छ । हुस्सु लागेकोले कसैले देखेको छैन ।
वडाध्यक्ष गौचनका अनुसार विमान टिटी तालको आकाशबाट देव्रे मोडिएर धवलागिरी हिमालपट्टी पुगेको अनुमान गरिए अनुसार मुलीवुक्यान र कालीवराह क्षेत्रमा स्थानीय परिचालन गरिएको छ ।
‘हामी धवलागिरी र टुक्चेपीकको फेदीको चरन क्षेत्रबाट तल झर्दैछौं । माथी हामीले केही आवाज सुनेनौं । तर आशंका गरिएको क्षेत्रमा जाँदैछौं’ मुली बुक्यानका चौरी गोठाना सकेन्द्र गौचनले बताए ।
पोखरा–जोमसोम उड्ने जहाजहरु म्याग्दी–मुस्ताङ सीमावर्ती घाँसा क्षेत्रको २ हजार ८ सय मिटर अग्लो स्थानमा कालीगण्डकी नदीलाई देव्रे पारेर उडान भर्छन । पोखरा–जोमसोम रुटमा उड्ने विमान म्याग्दीको घोरेपानीदेखी मुस्ताङको घाँसासम्मको क्षेत्रमा करिव ६ मिनेट टावरसँग सम्पर्क विच्छेद हुन्छन ।
पोखराबाट उडेको जहाज म्याग्दीको अन्नपूर्ण गाउँपालिका, ६ घोडेपानीबाट अगाडी पुगेपछि कालीगण्डकी नदीलाई देब्रे पारेर ‘वफर जोन’ मानिएको शिख, पाउद्धार, नारच्याङ्ग वस्तीमाथीबाट निलगिरी हिमाल छेउको ‘अन्धगल्छी’ छिचोली लेते पुगेपछि दाहिने मोडिएर जोमसोम पुग्छ ।
‘हामी स्थानीयवासी जम्मा गरी विमान नियमित उड्ने क्षेत्रमा खोजीका लागी परिचालन भएका छौं । अहिलेसम्म केही तथ्य फेला परेको छैन’ थासाङ गाउँपालिका अध्यक्ष प्रदीप गौचनले भने, ‘भुईसम्म बाक्लो हुस्सु लागेको छ, स्थानीय, गोठालाहरुसँग जहाजको आवाज सुनेको आधारमा खोजी थालेका छौं । बाक्लो कुहिरो लागेकोले कतै केही देखिएको छैन ।’