म्याग्दीमा ६६.२२ प्रतिशत मत खस्यो, भारी वर्षाले मतपेटिका ढुवानीमा समस्या

शुक्रवार सम्पन्न स्थानीय तह निर्वाचनमा म्याग्दीमा ६६.२२ प्रतिशत मत खसेको छ ।
जिल्ला निर्वाचन कार्यालयका कम्प्युटर अपरेटर गोविन्द थापाका अनुसार जिल्लाको कुल ८५ हजार ३ सय ७५ मत मध्य ५६ हजार ५ सय ४३ मत खसेको छ ।
अन्नपूर्ण गाउँपालिकाकी निर्वाचन अधिकृत जानुका सुवेदीका अनुसार १२ हजार ९९ मतदातामध्य ४ हजार महिलासमेत ७ हजार ८ सय तीन मत खसेको छ । निर्वाचन अधिकृत सुवेदीका अनुसार राती ८ बजेसम्म सवै १७ वटै मतदान केन्द्रबाट मतपेटिका आई पुग्ने र सर्वदलिय बैठकपछि मतगणना आज वा भोली विहानैबाट सुरु गर्ने निर्णय हुने छ ।
धवलागिरी गाउँपालिकाका निर्वाचन अधिकृत भोलाराज रेग्मीका अनुसार ११ हजार ९ सय ४० मतमध्य ६ हजार ६ सय ४२ मत खसेको छ । धवलागिरी गापा, १ गुर्जाबाट आज मतपत्र ल्याउन संभव नभएकोले भोली दिउँसोसम्म मतपेटिका आएपछि भोलीसाँझ बाट मतगणना सुरु गरिने भएको छ । धवलागिरी गापा, ५ मल्कवाङ र ६ वडा मराङका विभिन्न मतदान केन्द्रबाट पनि राती १० बजे अघि मतपेटिका आउने संभावना कम छ ।
मंगला गाउँपालिकामा १३ हजार ४ सय १६ मतमध्य ८ हजार ८ सय १७ (६५.७२ प्रतिशत) मत खसेको छ । निर्वाचन अधिकृत धर्मराज पौडेलका अनुसार सवै मतदान केन्द्रबाट साँझ ७ बजेसम्म मतपेटिका आई पुग्ने र सर्वदलिय वैठकबाट मत गणना आजै वा भोली गर्ने टुङ्गो लाग्ने छ ।
मालिका गाउँपालिकामा १३ हजार २ सय १ मतमध्य ८ हजार ९ सय ४६ मत खसेको निर्वाचन अधिकृतको कार्यालयले जनाएको छ । निर्वाचन अधिकृत गोविन्द उपध्यायका अनुसार शान्तिपूर्वक मतदान सकिएपछि मतपेटिका हिंडाउने बेला भारी वर्षा भै सडक अवरुद्ध भएकोले मतपेटिका ढुवानी अनिश्चित भएको छ । राती १० बजेभित्रबाट मतगणना गर्न नसकिए भोली विहानैबाट गणना सुरु गर्ने तयारी छ ।
रघुगंगा गाउँपालिकाका निर्वाचन अधिकृतको कार्यालयका अनुसार अनुसार १३ हजार ९ सय ४३ मतमध्य ९ हजार १ सय १३ (६५.३४ प्रतिशत) मत खसेको छ । निर्वाचन अधिकृत तेजप्रसाद पौडेलका नजिकका मतपेटिका आईपुगेपनि दुर्गम ८ नम्बर वडाको कुईने मंगलेको मतपेटिका आउन ढिलाई हुने भएकोले संभवत भोली विहानैबाट मतगणना सुरु हुने छ ।
बेनी नगरपालिकामा २२ हजार ४ सय २२ मतमध्य १५ हजार ३ सय ११ (६८.२९ प्रतिशत) मत खसेको निर्वाचन अधिकृतको कार्यालयले जनाएको छ । जिल्ला निर्वाचन कार्यालयका अनुसार खसेको मत विवरण मतदान अधिकृतहरुले आयोगमा सफ्टवयरमा अपलोड गरेको तथ्याङकलाई आधार तयार पारिएको हो ।