आज:  | Fri, 01, Jul, 2022

म्याग्दीमा ९४ थान लाइसेन्सवाला हतियार, राख्नेमा ११ जना महिला, वुझाउन प्रशासनको उर्दी

११ चैत्र २०७८, शुक्रबार १८:५८ मा प्रकाशित (3 महिना अघि)
पुनहिल संवाददाता

प्रशासन कार्यालय म्याग्दीले जिल्लामा भएका सवै ९४ थान इजाजत प्राप्त हतियारहरु नजिको प्रहरी कार्यालयमा बुझाउन भनेको छ ।
आसन्न स्थानीय तह निर्वाचनमा सुरक्षा ब्यवस्थित गर्न प्रशासन कार्यालयले शुक्रवार एक सूचना प्रकाशित गरी निर्वाचनपछि फिर्ता लैजाने गरी चैत २५ गते भित्र सवै हतियार बुझाउन भनेको हो । सूचनामा निर्धारित समय मित्र हतियार नवुझाएमा खानतलासी गर्दा फेला परे कानुन बमोजिम कार्वाही गर्ने उल्लेख छ ।


अभिलेख अनुसार जिल्लामा ९४ थान विभिन्न कम्पनी र मोडेलका ९४ थान इजाजत प्राप्त हतियार छन । इजाजत भएका हतियारमध्य अन्नपूर्ण गाउँपालिकाको भित्रका साविक गाविस अन्र्तगतका दोवा, दाना, नारच्याङ र राम्चेमागरी १५ थान हतियार छन । त्यस्तै रघुगंगा गाउँपालिका भित्र साविक गाविस अन्र्तगतका पाखापानी, पिप्ले, भगवती, बेग, दग्नाममा बढी हतियार छन । जिल्लामा सवै भन्दा धेरै पाखापानी ठेगाना उल्लेख गरिएको एक परिवारमा २५ वोर राईफल, २२ बोर राईफल, २ नाले १२ बोर विर्ज लोडिङ, १ नाले १२ बोर विर्ज लोडिङ, २२ बोर राईफलगरी ५ थान हतियार रहेको अभिलेखमा पाईन्छ ।
त्यस्तै बेनी नगरपालिका भित्र २६ थान हतियार छन । मंगलामा ९ थान, मालिकामा १४ थान र धवलागिरीमा ७ थान इजाजत प्राप्त हतियार छन । जातिगत रुपमा सर्वाधिक धेरै थकाली जातीसँग हतियार रहेका छन । लैङ्गिक रुपमा हेर्दा ११ जना महिलाको नाममा हतियार राखिएको अभिलेखमा भेटिन्छ ।