आज:  | Thu, 19, May, 2022

मुस्ताङमा उल्टो दिशामा हावा/हुरी वहने सिजन

३० फाल्गुन २०७८, सोमबार १८:२५ मा प्रकाशित (2 महिना अघि)
पुनहिल संवाददाता

आर्कषक दृष्यहरु, सम्पन्न जैविक विविधतायुक्त भुगोल रहेको हिमालपारी अवस्थित मुस्ताङमा अनौठो मौषमी विशेषता छ ।
मुस्ताङ्गमा सामान्यतया अन्नपूर्ण–धौलागिरी हिमश्रखलाले छेक्ने हुँदा मुस्ताङ्गमा ९ महिना छायाबृष्टी हुने र सुख्खा चिसो हावा दक्षिणबाट उत्तर तर्फ बहने गर्छ । तर फागुन–बैशाख तीन महिना उल्टो दिसा उत्तरबाट दक्षिण तर्फ हावा चल्ने गर्छ । मुस्ताङमा हावा विहानभन्दा दिउँसो र साँझ तिव्र हुरी भै बहन्छ ।
कालीगण्डकी नदीको निरन्तर कटानले बनेको संसारको सर्वाधिक साँघुरो ‘अन्धगल्छी’ मुस्ताङमा हावा छिर्ने र झर्ने घाँटी हो । फागुन–वैशाखमा मुस्ताङको उत्तरबाट दक्षिण बग्ने हावा बेगले अन्धगल्छीको घाँटीबाट छिर्ने चिसो सुख्खा हिमाली हावालाई उत्तरी हावाहुरी भन्ने गरिन्छ ।

‘यो उत्तरी हावाहुरीको सिजन हो । तल गर्मी बढ्न थालेपछि मुस्ताङको चिसो हावा माथीबाट तल तिर लाग्छ । यो वेला अति तिब्र हावाहुरी चल्ने गर्छ’ अन्नपूर्ण गाउँपालिका, ३ दानाका गंगा पुनले भने, ‘उत्तरी हुरीको पहिलो प्रभाव दानामा पर्छ । हामीले वर्षेनी हावाहुरीले अगो फैलाउने, घर, विद्यालयका छाना उडाउने समेत कुनै न कुनै दुर्घटना ब्यहोरेका छौं ।’
हिउँदमा मुस्ताङमा बाक्लो हिमपात हुन्छ । फागुनपछि तापक्रम बढ्नेहुँदा हिमालवारी तल्लो क्षेत्रबाट तातो हावामाथी उठ्ने र हिमालपारीको चिसो गरुङ्गो हावा तल झर्ने हुन्छ । संसारको सर्वाधिक साँघुरो घाँटी ‘अन्धगल्छी’बाट बेगले छिर्ने चिसो सुख्खा हिमाली उत्तरी हावाहुरी अन्नपूर्ण गाउँपालिकाका दाना, नारच्याङ्ग, भूरुङ्ग, शिख, घार र हिस्तान क्षेत्रमा बढी असर पुर्‍याउने गरेको छ ।