आज:  | Sun, 03, Jul, 2022

जाँदा जाँदै बेनी नगरपालिकाले ८१ लाखकाे बजेट बाँडफाँड

३० फाल्गुन २०७८, सोमबार १९:५९ मा प्रकाशित (3 महिना अघि)
पुनहिल संवाददाता

कार्यकालकाे अन्तिम चरणमा जाँदाजाँदै बेनी नगरपालिका कार्यपालिकाकाे ७५ अाैं वैठकबाट विभिन्न याेजनामा ८१ लाख रूपैयाँ वितरण गरेकाे छ ।

साेमबार नगरपालिकाका प्रवक्ता रामकृष्ण वराइलीले पत्रकार सम्मेलन गरी कार्यपालिकाकाे ७५ अाैं वैठककाे निर्णय सार्वजनिक गर्दै सडक वाेर्डबाट प्राप्त ५५ लाख र नगरपालिकाकाे समपुरक काेषबाट २७ लाख गरी ८१ लाखकाे बजेट विभिन्न याेजनामा बाँडेकाे बताए ।

प्रवक्ता तथा वडा नं ८ का वडाध्यक्ष वराइलीका अनुसार बेनी नगरपालिका–४ मसार वस्ती म्याग्दीखाेलाबाट संरक्षणमा १० लाख, साेही स्थानकाे उपल्लाे बजार संरक्षणमा चार लाख विनियाेजन भएकाे छ । बेनी स्थित क्षत्री समाज भवन पुनःनिर्माणा गर्न १० लाख, १० वटै वडामा मागकाे अाधारमा याेजना छनाैट गर्नेगरी दामासाहीले २-२ लाख विनियाेजन गरीएकाे छ ।

त्यसैगरी बेनी नपा, २  हाँडेभिर–लभ्लीहिल सडक र बेनी नगरपालिका–३ स्थित दुधेखोला –हल्लेगौडा–भकिम्ली सडक मर्मत तथा स्तरोन्नती गर्ने बजेट ब्यवस्था गरिएकाे छ । सशर्त अनुदानका रुपमा प्राप्त भएको बाली विकास कार्यक्रमको लागि आएको रु २५ लाख ५० हजार बजेटलाई वडा नम्बर १, ४, ५, ६ र ९ मा सञ्चालन गर्ने निर्णय समेत भएको छ ।

त्यस्तै बेनी नगरपालिका, ७ विरेन्द्रचोक स्थित जिल्ला प्रशासन कार्यालय अगाडीको पिपल रुखको हाँगा काट्ने क्रममा रुखबाट खसेर मृत्यु भएका मजदुरको परिवारलाइ बेनी नगरपालिकाले श्रम एेन अन्तर्गत ७ लाख २५ हजार दिने भएकाे छ । नगरपालिकाले रूखका हाँगा काट्न लगाएकाे थियाे ।

केही समय अघि रुखबाट ढुङ्गा विच्छाएको चौतारीमाथी खसेर मालिका गाउँपालिका, २ रुम घर भै पर्वतको जलजला गाउँपालिका, ३ वारीवेनी बस्ने थानबहादुर पुन (४२)को वे मृत्यु भएको थियाे ।