पुनहिल संवाददाता
नेकपा एमालेले स्वास्थ्य मन्त्री विरोध खतिवडाले पहिलो डोज खोप किनेर लगाएको भन्दै टेलिभिजनमा दिएको अन्तरवार्ता झुटो भएको बताएको छ । उसले सार्वजनिक सञ्चारमाध्यममा झुटो कुरा गर्ने मन्त्री खतिवडाले नैतिकताको आधारमा राजिनामा दिनु पर्ने माग गरेको छ ।
पार्टीका स्वास्थ्य विभाग प्रमुख योगेश भट्टराईले आज विज्ञप्ती जारी गर्दै केपी ओली नेतृत्वको सरकारले २०७७ फागुन १९ देखि २१ सम्म संघीय संसद सदस्यहरुलाई सिभिल अस्पतालमा निशुल्क खोप उपलव्ध गराएको र मन्त्री खतिवडाले त्यसबेला सिभिल अस्पतालको रजिष्टर ख को क्रशं ४८ मा नाम दर्ता गरी खोप लगाएको उल्लेख छ ।
विज्ञप्तीमा ६२ वर्षका खतिवडाले पहिलो डोज व्याच नं ४१२०जेड ००४ को कोभिसिल्ड खोप लगाएको उल्लेख छ ।
मन्त्री खतिवडाले केही दिन अघि सगरमाथा टेलिभिजन र प्राइम टाइम टेलिभिजनलाई दिएको अन्तरवार्तामा पूर्ववर्ती सरकारले खोप व्यवस्थापन नगरेको आरोप लगाउने क्रममा आफूले कोभिडविरुद्धको खोप ५ हजार रुपैयाँ तिरेर लगाएको बताएका थिए ।
विज्ञप्तीमा मन्त्री खतिवडाले पूर्ववर्ती सरकारलाई बदनाम गर्नकै लागि आम जनसमुदायलाई गलत सूचना दिएर कोभिड जस्तो संवेदनशील विषयमा अफभाह सिर्जना गरेको भन्दै निन्दा गरिएको छ ।
