गाउँवस्ती ढपक्कै ढाकियो हिउँले, कृषक खुशी

मंगलवार साँझदेखी शुरु भएको हिमपातले जिल्लाका पर्यटकीय क्षेत्र महरे, घोडेपानी/पुनहिल, खोप्रो, गुर्जा लगाएत जिल्लाको उपल्लो भेगका वस्तीहरु हिउँले ढपक्कै ढाकिएको छ । हिमपात नरोकिएकोले अझै तल्लो क्षेत्रसम्म हिउँ पर्न थालेको छ ।
लामो समयपछि बाक्लो हिमपातहुँदा चिसोले बृद्धबृद्धा, बालबालिका र न्यानो कपडा नभएका विपन्न चिसोले कठ्याङ्ग्रीएका छन । तर चिसो र जाडो विर्सेर कृषकहरु भने खुशी भएका छन । आकाशे पानीको सिंचाईमा निर्भर यहाँका अधिकांश ग्रामिण खेत र पाखोवारीको खेती प्रणालीमा झरी र हिमपातले राम्रो गरेको हो ।
‘रातीदेखी वर्षको पहिलो हिमपात भैरहेको छ । चिसोबढेपनि कृषककालागी यो सिजनमा हिमपात हुन राम्रो हो’ अन्नपूर्ण गाउँपालिका, ८ राम्चेका कृषक फासबहादुर गर्वुजाले भने, ‘हिउँ पर्न अझै ढिला भयो । जौ, गहुँवालीलाई सिंचाई र आलु रोप्न माटोमा चिस्यान पुग्छ ।’
त्यसैगरी हिमालपारीको जिल्ला मुस्ताङ्गभर बाक्लो हिमपात भएको छ । मुस्ताङ्ग जिल्लाभर हिमपात भएकोले नदीबाहेकका सवै भूभागमा बाक्लो हिउँ जमेकोले हिमाल झै बनेको छ ।
सडक तथा हवाई धावनमार्गमा बाक्लो हिउँ थुप्रो लागेकोले मुस्ताङ्गका सवै सडकमा र पोखरा–जोमसोम हवाई यातायात अवरुद्ध छ । बाक्लो हिमपातले वल्लोपल्लो घर गर्न समेत कठिन भएको छ ।
चिसोले चर्पीको पानी जमेकोले दिसा पिसावमा समेत समस्या छ । तर मुस्ताङ्गका स्याउ कृषकहरु भने हिमपातले खुसी भएका छन । स्याउका विरुवमा पालुवा लाग्ने बेला हुँदासम्म हिउँ परेको थिएन । केही दिन अघि समान्य हिउँ परेपनि भुईमा जमेको थिएन ।
घरपजोङ गाउँपालिका उपाध्यक्ष शर्मिला गुरुङका अनुसार जोमसोममा दुई फिट हिउँ परेको छ । हिमपात जारी छ । मुस्ताङ्गको सवैभन्दा तलको वस्ती घाँसादेखी नै जिल्लाभरका सवै भूगोलमा बाक्लो हिउँ परेको छ ।