रञ्जु दर्शनाले परित्याग गरिन् विवेकशील साझा पार्टी, तत्काल कतै नजाने

युवा नेत्री रञ्जु दर्शनाले विवेकशील साझा पार्टी परित्याग गरेकी छन् ।

पार्टी संयोजक मिलन पाण्डेलाई साधारण सदस्यसमेत नरहने गरी कारबाही गरिएको तेस्रो दिन दर्शनाले पार्टी परित्याग गरेकी हुन् । उनले सो पार्टीको साधारण सदस्यसमेत नरहने गरी पार्टीबाट अलग भएको बताएकी छिन् ।

‘म आफूले लिएको सम्पूर्ण जिम्मेवारी र हरेक पदबाट साधारण सदस्यसमेत नरहने गरी विवेकशील साझा पार्टीसँगको संलग्नताबाट आफूलाई स्वतन्त्र पार्दछु,’ दर्शनाले बिहीबार जारी गरेको विज्ञप्तिमा भनिएको छ ।

आज बिहीबार उनले अध्यक्ष रवीन्द्र मिश्रलाई सम्बोधन गर्दै इमेल र पत्र पठाएर पार्टीको सम्पूर्ण जिम्मेवारी र पदबाट अलग भएको घोषणा गरेकी छन् । आखिर रञ्जु जस्ती जुझारु युवा नेत्रीले विवेकशील साझा पार्टी किन छोडिन् ? भनेर राजनीतिक वृत्तमा चासो बढेको छ ।

उनले अध्यक्ष मिश्रलाई लेखेको पत्रमा भनेकी छन्, ‘मिति २०७८ पौष ८ गतेबाट अन्य कुनै राजनीतिक निर्णय नलिएसम्म एक सचेत स्वतन्त्र नागरिकको भूमिकामा मात्रै राजनीतिक रूपमा सक्रिय रहनेछु ।’

उनले अध्यक्ष मिश्रलाई लेखेको पत्रअनुसार पार्टीको मूल नेतृत्व ढोंगी भएको भन्दै विवेकशील साझा पार्टी परित्याग गरेको स्पष्ट बताएकी छन् । आज बिहीबार एक विज्ञप्तिमार्फत दर्शनाले पौष ८ गतेबाट अर्को निर्णय नलिएसम्म स्वतन्त्र नागरिकको भूमिकामा रहने स्पष्ट गरेकी हुन् ।