बालबालिकामा देखिएको हात, पैताला तथा मुखको रोग के हो ?

म्याग्दी सदरमुकाम बेनीका १० बर्ष मुनिका बालबालिकाको हात,पैताला तथा मुखमा स-सना राता बिमिरा अाउने कोक्सेक्की भाइरस र इन्टेरो भाइरस ७१ धेरै देखिएकाे छ । पछिल्लो समय बालबालिकामा एकै खालको छातीको संक्रमण फैलिएको बेला पुनः अर्को नयाँ रोग (ह्याण्ड, फुट, माउथ डिजिज) को संक्रमण बढेको हो ।

बेनीका विभिन्न स्कुलका मन्टेश्वरीमा अध्ययनरत बालबालिकामा ज्वरो आउने, खाना नरुच्ने, घाँटी दुख्ने, जिब्रो, गिजा, गाला, पैताला र हत्केलामा रातो बिमिरा आई पानी र पिप जस्तो घाउहरु देखिने समस्या फैलिएकाे ति विद्यालयले जनाएका छन ।

यो रोग लागेमा के-के कुराहरुमा ध्यान दिनुपर्छ ?
– बिरामी बच्चालाई धेरै पानी खुवाउने
– नरम खाना तथा झोलिलो खाने कुराहरु खुवाउने
–  पर्याप्त मात्रामा आराम गराउने
–  मुखको अल्सरबाट आउने ज्वरो र दुखाइ कम गर्नका लागि सो अनुसारको उपचार दिने
– बिरामी बच्चाको सम्पर्कमा आएपछि साबुनपानीले हात धुने

यो रोग कसरी सर्छ ?
बिरामी बच्चाको सिँगान, र्याल खकार साथै फोकाको पिपबाट यो रोग सर्न सक्छ।

रोकथामको उपाय
नियमित सरसफाइ नै यस रोगबाट बच्ने मुख्य उपाय हो।
सामान्यतया यो रोग एक हप्तमा सञ्चो हुन्छ तर कुनै कठिनाई भएमा तुरुन्तै अस्पताल गई स्वास्थ्यकर्मीको सल्लाह लिनुहोस्।

(स्राेत: स्वास्थ्य तथा जनसंख्या मन्त्रालय)