आज:  | Tue, 18, Jan, 2022

रघुगंगा गाउँपालिकाले जीप दुर्घटनामा मृतकका परिवारलाई किरिया खर्च र घाईतेलाई उपचार खर्च दिने

१४ मंसिर २०७८, मंगलवार १०:३० मा प्रकाशित (1 महिना अघि)
पुनहिल संवाददाता

रघुुगंगा गाउँपालिकाले जीप दुर्घटनामा ज्यान गुमाएका मृतकको परिवालाई किरिया खर्च वापत जनही ५० हजार र घाईतेको उपचारमा जनही एक लाख रुपैयाका दरले सहयोग गर्ने भएको छ ।
सोमबार साँझ सदरमुकाम बेनीबाट रघुगंगा गाउँपालिका, १ बेग गाउँ जाँदै गरेको निलगिरी यातायात प्रालिको ग १ ज ७२५१ नम्बरको बोलेरो जीप सोही गापा, १ घाप्पा भन्ने स्थानमा दुर्घटनाग्रस्त हुँदा वडासदस्य गौमायाँ विक, चालक दुतबहादुर थापा, खिमनाथ शर्मा र खिम पुनको मृत्यु भएको थियो ।
रघुगंगा गाउँपालिका कार्यपालिकाको मंगलवार विहान आकस्मिक वैठकवसी मृतकका परिवारलाई किरिया खर्च र घाईतेको उपचारमा जनही एक लाख सहयोग गर्ने निर्णय गरेको थियो ।
त्यसैगरी दुर्घटनामा मृत्यु भएकी वडासदस्यसमेत मृतकहरुको सम्झनामा गाउँपालिका कार्यालय मंगलवार एक दिन विदा गरिएको प्रमुख प्रशासकीय अधिकृत अमृत सुवेदीले बताए ।
दुर्घटनामा परि स्थानीय वेगका मनोज पुन, भीम फगामी, बलबहादुर विक र ज्ञानबहादुर शेरपुजा गम्भीर घाईते भएका थिए । गम्भीर घाईते शेरपुजाको पोखरा स्थित मणीपाल शिक्षण अस्पतामा उपचार भैरहेको छ ।
उकालो सडकको साँघुरो घुम्तीमा वोलेरो जीपले टर्निङ लिन नसक्दा सडकदेखी अन्दाजी ५० मिटरतल जंगल भएको खोल्सामा खसेको थियो ।