प्रचण्डसँग पार्टी एकता संभव छैन– विप्लव

८ मंसिर २०७८, बुधबार २०:४९ मा प्रकाशित (1 हप्ता अघि)
पुनहिल संवाददाता

नेकपा महाँसचिव नेत्रविक्रम चन्दले माओवादी केन्द्र र प्रचण्डसँग पार्टी एकता हुन लागेको कुरा आत्मरतीमा रमाउन खोज्नेले चलाएको हल्ला मात्र भएको बताएका छन ।
‘पार्टी एकता भनेको नेताहरुको टाउको जोडिने मात्र होईन, जनताको सपना, चाहना र मनको मिलन हुनु हो । कसैको पार्टी ठूलो बनाउन, सरकारमा पुऱ्याउन, सरकार बनाउन र सुखभोग गराउन पार्टी एकता संभवन छैन’ मगर मुक्तिमोर्चाको चौंथो राष्ट्रिय सम्मेलनलाई सम्बोधन गर्न बुधवार बेनी आएका विप्लवले भने, ‘हामी पार्टी एकताको पक्षमा छौं । प्रचण्डजी तपाई जनयुद्धको कमाण्डर हुनु भो, अध्यक्ष हुनु भो, प्रधानमन्त्री बन्नु भो, सवै भोग्नु भो कतै सफल बन्नु भएन । अव हाम्रो पार्टीमा आउनुस मिलेर काम गरौं ।’


‘प्रधानमन्त्री समेत सर्वोच्च अदालतल बनाएपछि ब्यवस्थापिकाको, दुई तिहाईको बहुमतको सरकार टिकाउन समेत नसकेपछि कार्यपालिकाको र सर्वोच्च अदालतमा भैरहेको आन्दोलनले सेटिङ, आर्थिक लाभको आधारमा फैसला हुने खुलासा न्यायाधिसहरुले नै पुष्टी गरेपछि न्यायपालिका असफल सिद्ध भए । ब्यवस्थापिका, कार्यपालिका र न्यायापालिका तीनै अङ्गहरु असफल भएसँगै संसदीय ब्यवस्थाको औचित्य समाप्त भयो’ महासचिव विप्लवले थपे, ‘जनताको मतमा विश्वास नभएपछि संसदीय दलका नेताहरु समानुपातिको बाटोबाट पैसा असुल गर्ने धन्दामा छन । जनमत संग्रहबाट डराएका छन । प्रत्यक्ष निर्वाचनबाट जनमत संग्रहको विकल्पको पनि प्रयोग गरौं ।’
नेता विप्लवले ०४६ सालको जनआन्दोलनबाट प्राप्त बहुदलिय ब्यवस्थाले जनताको चाहना पुरा गर्न नसकेपछि जनयुद्ध जन्म्यो । जनयुद्धले पुरै देशको ८० प्रतिशत भुगोलमा आफ्नै जनसत्ता स्थापना गरेको थियो । त्यो जनसत्तालाई प्रचण्ड–बाबुरामले धुलोमा मिसाए । नष्ट गरे । कुनै नेताको अनुहार हेरेर जनयुक्तमा नलागेकै कारण श्रमजिवीको जनसत्ता पुर्नप्राप्ती गर्न ०७१ मंसिर ८ जने पार्टी पुर्नगठन गरेको पनि बताए ।


एमसिसि समेत वैदेशिक हस्तक्षेप थेग्न नसक्ने हो भने नेपालमा गृहयुद्ध सन्निकट रहेको बताउँदै महासचिव विप्लवले प्रश्न गरे, ‘हेलिकोप्टरमा देशदेशावरको दर्शनमा डुल्नेहरुले कालापानीमा जनगणना गर्न गणकलाई हेलिकोप्टरमा पुऱ्याउन किन सक्दैन ? जयसिं धामीलाई जिउँदै खोलामा बगाउँदा नेपालको सरकार किन बोल्न सक्दैन ?’
उनै विप्लवको नेतृत्वमा ०६० साल चैत ७ गते राती बेनीमा तत्कालिन माओवादीले शसस्त्र आक्रमण गरेको थियो । ‘५ हजार शसस्त्र माओवादी योद्धाहरु ६ दिन लामो हिँडाई पछि बेनी आक्रमणमा सरिक भएका थियौं । यहाँको दुई नदीमा माओवादीको रगत मिसिएको छ, डाँडामा रगत भिजेको छ र जंगल माओवादीका रगतले सिंचित भएको छ’ विप्लवले बेनी आक्रमणलाई स्मरण गर्दै भने, ‘जनयुद्धले स्थापित जनसत्ता प्राप्तीकालागी संघर्ष थालेका छौं । हामीमाथी दमन भए पनी मर्न/मार्न तयार छौं ।’