अखिल (क्रान्तिकारी)को सम्मेलनमा नाराबाजी, केन्द्रीय कमिटी घोषणा हुन सकेन

कपा (माओवादी केन्द्र) निकट अखिल क्रान्तिकारीको काठमाडौंमा भएको २२औँ राष्ट्रिय सम्मेलनले अध्यक्ष मात्र चुन्न सकेको छ ।

बबरमहलस्थित कार्की पार्टी प्यालेसमा पदाधिकारी र केन्द्रीय कमिटीको नाम घोषणा गर्ने तयारी गरिए पनि विधान संशोधनका सन्दर्भमा प्रतिनिधिले नाराबाजी गरेपछि नाम घोषणा हुन नसकेको हो ।

विधान संशोधन प्रस्तावमाथि अध्यक्षमण्डलले पदाधिकारी र केन्द्रीय सदस्य संख्या थप गर्ने निर्णय सुनाउन लाग्दा प्रतिनिधिले नाराबाजी गरेका थिए । निरन्तर नाराबाजीका कारण अध्यक्ष पञ्चा सिंहको नाम मात्र घोषणा गर्दै सम्मेलन सकिएको थियो ।

माओवादी केन्द्रका अध्यक्ष पुष्पकमल दाहाल ‘प्रचण्ड’सँगको छलफलमा क्रान्तिकारीको अध्यक्ष पञ्चा सिंहलाई बनाउने निर्णय गरिएको थियो । महासचिवमा दीपेश पुनको नाममा सहमति जुटेको छ ।

अखिल क्रान्तिकारीले अब २५ सदस्यीय पदाधिकारी र १ सय ९९ सदस्यीय केन्द्रीय कमिटी बनाउने नीति लिएको छ । यसअघि क्रान्तिकारीको केन्द्रीय कमिटीमा २ सय ४३ जना थिए । अब अध्यक्ष १, उपाध्यक्ष ३ खुला र ४ समावेशी, महासचिव १ हुनेछन् भने २ उपमहासचिव हुनेछन् । उपत्यका विशेष प्रदेशसहित ७ प्रदेशबाट १-१ गरी ८ जना सचिव हुनेछन् । थप ५ समावेशी सचिव बनाउने अधिवेशनले पारित गरेको छ । १ कोषाध्यक्ष हुनेछ ।

सम्मेलन यही १४ असोजदेखि काठमाडौंमा क्रान्तिकारीको २२औँ राष्ट्रिय सम्मेलन सुरु भएको थियो ।