‘रातो कर माफ गर’, ‘रातो कर खारेजी गर’

महिनावारी भएको समयमा प्रयोग गरिने प्याडको मूल्यमा सरकारले लगाएको करको विरोधमा आज माइतीघरमा विरोध प्रदर्शन भएको छ। युथ कांग्रेस नेपालका सदस्यहरूले स्यानिटरी प्याड विलासिता होइन आवश्यकता हो भन्दै प्रदर्शन गरेका हुन्।

प्रदर्शनकारीहरूले सरकारसँग १० प्रतिशत भन्सार शुल्क र १३ प्रतिशत भ्याट प्याड तथा अन्य उत्पादनमा लगाइएको कर खारेजीको माग गरेका हुन्। उनीहरूले ‘रातो कर माफ गर’, ‘रातो कर खारेजी गर’ लगायत नारा लगाएका थिए।

सरकारले प्याडलाई बिलासी बस्तु अन्तर्गत राखि १३ प्रतिशत मूल्य अभिवृद्धि कर तथा भन्सार महसुल लगाउने गरेको छ । यसले नेपालको कूल जनसंख्याको ५४ दशमलव ३९ प्रतिशत जनसंख्या रहेका महिलाहरुलाई संविधानद्वारा प्रदत्त मौलिक हक र सार्वभौम मानव अधिकारको उल्लङ्घन भएको दावी गरिएको छ । 

महिलाले महिनावारी अथवा रजस्वाला चक्र भएको बेला प्रत्येक महिना एक हप्ताको लागि स्यानेटरी प्याड प्रयोग गर्दा जीवनकालमा करिब ३८ वर्षसम्म प्याड प्रयोग गर्नुपर्ने हुन्छ । स्यानिटरी प्याडलाई अर्थ मन्त्रालयले ‘लक्जरी वस्तु’को कोटाबाट हटाएर अत्यावश्यक सामग्रीमा सूचीकृत गर्न मागसमेत गरिएको छ ।