दाताले मोवाईल सहयोग गरेपछि भर्चुअल कक्षामा जोडिए बालगृहका बालबालिका

२८ असार २०७८, सोमबार ०९:२६ मा प्रकाशित (1 हप्ता अघि)
पुनहिल संवाददाता

अभिभावकको मृत्य वा अन्य कारणले अभिभावकत्व गुमाएपछि वालगृहमा आश्रित ११ जना बालबालिकाहरु भर्चुअल कक्षामा जोडिएका छन ।
दाताहरुले वाल गृहमा रहेका सवै ११ जना वालबालिकालाई एक–एक थान स्मार्ट फोन खरिदिएपनि उनीहरु विद्यालयले सुरु गरेको अनलाईन कक्षामा जोडिन पाएका हुन । वालबालिकालाई भर्चुअल कक्षामा जोड्न वालगृहले इन्टरनेट र १५ हजार ५ सय मुल्य बराबरका सवै ११ जना विद्यार्थीकालागी स्मार्ट मोवाईल जुटाएको हो । विद्यालयहरुले भर्चुअल माध्यमबाट अध्ययन/अध्यापन सुरु गरेपनि बालगृहमा बालबालिका अनलाईन पठाईबाट वन्चित थिए ।
‘कक्षाका सवै साथीहरु अनलाईन कक्षामा जोडिएका थिए । मेरो मोवाईल नभएकोले अनलाईन कक्षा पढ्न पाएकी थिईन । मोवाईल भएपछि पढ्न सजिलो भएको छ’ न्यू वेष्टपोईन्ट आवसीय माध्यामिक विद्यालय सात कक्षामा अध्ययनरत करिना कार्की भनिन, ‘वालगृहमा बस्ने हामी सवैले मोवाईल पाएका छौं, हामीले पनि अव अनलाईन कक्षामा पढ्छौं ।’
कार्कीको विद्यालय न्यूवेष्ट पाईन्ट आमाविले असार ५ गतेदेखी नै नयाँ शैक्षिक सत्रको पढाई सुरु गरेका छ । निजी क्षेत्रको विद्यालयले सामाजिक उत्तरदायित्व अन्र्तगत कार्कीलाई केही वर्षदेखी नि:शुल्क अध्यापन गराउँदै आएको छ ।
अघिल्लो शैक्षिक सत्रको सुरु र अन्तिममा पनि यहाँका निजी तथा सामुदायीक विद्यालयहरुले भर्चुअल कक्षाबाट अध्ययन अध्यापन गराएका थिए । तर वालगृहका बालबालिका भने उपकरण नभएकोले भर्चुअल कक्षामा जोडिन सकेनन । विद्यालयले पनि कुन विद्यार्थी छुटे कुनै चासो राखेनन ।


‘कोरोना भाईरस संक्रमणको माहामारीले अघिल्लो शैक्षिक सत्रदेखी नै विद्यालयमा नियमित कक्षा रोकिए । प्राय: सवैले भर्चुअल माध्यमबाट पठाई गरे । तर वालगृहका बालबालिका अनलाईन कक्षाबाट वन्चित रहे । त्यसैले यो वर्ष दाताबाट एक खाल ७० हजार ५ सय सहयोग जुटाएर सवै बालबालकाको हातमा स्मार्ट मोवाईल दिएका छौं’ म्याग्दी बाल गृहका अध्यक्ष राजेश शाक्यले भने, ‘बालबालिकामा हामी वालगृहमा बस्ने वेसहारा, परित्यक्त भन्ने मनोविज्ञान अन्त्य गर्न चाहन्छौं । असाहाय वालबालिकाको नाममा हुने सहयोगको उच्च सदुपयोगको पक्षमा छौं ।’
नेपाल बाल संगठन मातहत संञ्चालित म्याग्दी वालगृहमा आश्रित ११ जना बालबालिका सवै एउटै विद्यालयमा भने पढ्दैनन । रोजी पौडेल र कल्पना रोका मगरले बेनी सामुदायीक माध्यामिक विद्यालय कक्षा ९ मा पढ्छन । बेनी सामुदायीक विद्यालयले भने साउन १ गतेबाट मात्र अनलाईन कक्षा सुरु गर्ने जनाएको छ ।
त्यसैगरी वालगृहका कृष्णकुमारी भण्डारी र हिरा नेपालीले कालीपुल स्थित वालमन्दीर आधारभुत विद्यालय कक्षा ८ मा अध्ययनरत छन । विद्यालयले गत असार २० गतेबाट भर्चअल माध्यमबाट अनलाईन पठनपाठन सुरु गरेको छ ।
‘साथीहरु अनलाईन कक्षाबाट पढ्थे । हामी अघिल्लो वर्ष पनि पढ्न पाएनौं । अहिले त मोवाईल फोन पाएका छौं, आज पहिलो दिन अनलाईन कक्षा जोडियौं’ हिरा नेपालीले भनिन, ‘वालगृहका सरहरुले सवैका मोवाईलमा अनलाईन कक्षा पढ्ने जुम आईडी बनाई दिनु भएको छ । मोवाईलमा पढ्दा रमाईलो भएको छ ।’


वालमन्दीर आधारभुत विद्यालयकै कक्षा ५ मा अध्ययनरत अजय बानियाँ, इन्द्रबहादुर भण्डारी, कक्षा ४ का सीता सार्की, निराजन छन्त्या र कक्षा १ का प्रेम दमाई र मनिसा सुनारको हात–हातमा पनि अनलाइन कक्षा पढ्न मोवाईल आएको छ । तर विद्यालयले तल्लो कक्षामा अनलाईन पठाई सुरु गरेको छैन ।
‘गत वर्ष मेरो ठूलो कक्षाका नानीहरुले एउटा एउटै मोवाईलमा आलोपालो गरी मुख्य विषय पढे । अहिले भने नयाँ समिति आएको छ, समितिले सवैलाई मोवाईल ल्याईदिनु भएको छ’ वालगृहमा बालबालिकाको स्याहार सुसार गर्दै आएकी सावित्रा थापा मगरले भनिन, ‘२४ सै घन्टा वाईफाई इन्टरनेट जोडिएको र मोवाईल फोन पाउँमा बालबालिका उत्साही छन । मोवाईल फोन वालगृहले बनाएको आईडी मात्र प्रयोग हुन्छ, फोन सीम र अन्य सामाग्री प्रयोग गर्न नपाईने गरिएको छ ।’