प्रमुख जिल्ला अधिकारीले दुर्व्यवहार गरेको भन्दै विरोध

२७ असार २०७८, आईतवार १७:२० मा प्रकाशित (1 हप्ता अघि)
पुनहिल संवाददाता

समाचार संकलन प्रयोजनकालागी जिल्ला प्रशासन कार्यालय पुगेका दुई जना पत्रकारलाई प्रमुख जिल्ला अधिकारी गणेशबहादुर अधिकारीले दुर्व्यवहार गरेको भन्दै पत्रकारका छाता संगठनहरुले विरोध गरेका छन ।

द्धन्द्ध पिडित अधिकार मञ्च म्याग्दीको ज्ञापनपत्र बुझाउने कार्यक्रमको समाचार संकलनका लागि प्रशासनमा पुगेका साधन राम्जाली र धिरेनबहादुर खत्रीलाई समाचार, तस्बिर र दृष्य संकलन गर्न रोक लगाएर प्रजिअले कार्यकक्षबाट निकालेको नेपाल पत्रकार महाँसघ, म्याग्दी मिडिया सोसाईटी र प्रेस संगठनले विज्ञप्ती प्रकाशित गरी जनाएका छन ।

प्रजिअको दुर्व्यवहारमा परेका भनिएका पत्रकार साधन राम्जालीले भने, ‘हामीले फोटो खिच्न लाग्दा उहाँले रोक्नु भयो, मैले आफ्नो परिचय दोहोऱ्याए । उहाँले फेरी अनुमति विना फोटो नखिच भने पनि नमस्ते भन्दै म बाहिरिएको हुँ ।

द्वन्द पीडित मञ्चका अध्यक्ष सुरेन्द्र खत्रीको नेतृत्वमा पुगेको टोलीले प्रजिअ अधिकारीलाई ज्ञापनपत्र पढेर सुनाउने क्रममा पत्रकारद्धयले तस्विर र भिडियो लिने क्रममा अनुमति नलिई फोटो खिचेको भन्दै पत्रकारद्धयलाई कार्यकक्ष छोड्न आदेश विज्ञप्तीमा उल्लेख छ ।

‘म कार्यकक्षमा प्रवेश गर्ने वित्तिकै एक जनाले ज्ञापन पत्र पढ्छु भन्दै उठे, दुई जनाले भिडियो/फोटो खिच्न थाले । त्यसपछि मैले ज्ञापन पत्र बुझाउने कस्ले हो भन्ने जानकारी पनि छैन। समय लिएको पनि छैन भनेको हो । युट्युवे ठानेर मैले अनुमति वेगर फाटो/भिडियो नखिच्न भनेको हो ।’ प्रमुख जिल्ला अधिकारी गणेशबहादुर अधिकारीले भने, ‘पत्रकार हुनुहुँदो रैछ । तर उहाँहरुको तरिका पनि ठिक थिएन । निहुँ खोज्ेको हो भन्दै उफ्रेपछि बाहिर जानुस भनेको हो । पेशागत शैल ी र सभ्यता सवैले जान्नु पर्छ ।’