वेपत्ता शिक्षक भक्त कार्कीको हत्या आशंका

बेनी नगरपालिका, ५ बगुवाखोला स्थित वालजागृती आधारभुत विद्यालयका प्रध्यान अध्यापक भक्त कार्की शंकास्पद वेपत्ता भएका छन ।

सोमबार विहानै विद्यालय नजकै बेनी–दरवाङ सडकको चुत्रेनी खण्डको सडकदेखी करिव १० मिटर तल म्याग्दी खोला नजिकै बगरमा रगताम्मे भएको तथा कार्कीले लगाउने इष्टकोट, चप्पल र मोवाईल फेला परेको छ ।

स्थानीयले आईतवार दिउँसो नै कार्कीको हत्यागरी शव नदीको भेलमा फालेको आशंका गरेका छन । आईतवार विहान ८ बजे घरबाट विद्यालय जान निक्लेका कार्की रातीसम्म घर नफर्केपछि परिवारले प्रहरीलाई खवरगरी खोज्ने काम थालेका थिए ।
प्रहरीले घट्ना स्थलमा फेला परेका प्रमाणसहित विद्यालयमा कार्यरत केही कर्मचारीलाई सोधपुछ सुरु गरेको छ ।
‘वेपत्ता भनिएका व्यक्तिको शव फेला नपरी वा पुष्टी नभै तत्काल हत्या भएको भन्न मिल्दैन । तर घट्ना स्थलको प्रकृति हेर्दा शंकास्पद छ’ प्रहरी नायवउपरिक्षक श्याम राईले भने, ‘अनुसन्धानकालागी केही व्यक्तिसँग सोधपुछ थालेका छौं । अनुसन्धान सुरु भएको छ ।’

कार्की सत्तारुढ एमाले निकट शिक्षक संगठनका पूर्व जिल्ला अध्यक्ष तथा एमालेका जिल्ला नेता पनि हुन ।