FLASH NEWS
  • Loading...

विश्वकप छनोटको तीव्र तयारीमा नेपाली फुटबल टोली

  • पुनहिल डट कम
  • २ साल अघि
  • १४१ पटक पढिएको
विश्वकप छनोटको तीव्र तयारीमा नेपाली फुटबल टोली

नेपाली राष्ट्रि फुटबल टोली हाल कुवेतमा प्रशिक्षणरत छ । फिफा विश्वकप २०२२ तथा एसिया कप २०२३ का छनोट चरणअन्तर्गत बाँकी खेल खेल्नका लागि आइतबार राति कुवेत पुगेको नेपाली टोलीले सोमबार साँझबाट प्रशिक्षण थालेको हो ।

त्यसअघि आइतबार जिम सेसन गरेको उसले हिजो साँझबाट कुवेतस्थित काज्मा स्पोर्ट्स मैदामा पहिलो अभ्सास सेसन गरेको थियो । आइतबार नै सबै खेलाडी तथा पदाधिकारीको कोरोना भाइरस परीक्षण गरेर टोली प्रशिक्षणमा जुटेको हो । पिसिआर परीक्षण सबैको नेगेटिभ आएको थियो ।

नेपाली टोलीले शनिबार इराकविरुद्ध मैत्रीपूर्ण खेल खेलेको थियो । इराकको मैदानमा ६-२ गोल अन्तरकाे हार ब्यहाेरेको नेपाली टोली आइतबार साँझ ६ बजे स्थलमार्ग हुँदै कुवेततर्फ गएको थियो । कुवेतमा नेपाली टोलीले तीन खेल खेल्ने छ ।

पहिलो खेल नेपालले यही जेठ २० गते चाइनीज ताइपेइसित खेल्ने छ । दोस्रो खेल जेठ २४ गते जोर्डनसित तथा तेस्रो खेल जेठ २८ गते अष्ट्रेलियासँग खेल्ने कार्यक्रम रहेको अखिल नेपाल फुटबल संघ (एन्फा)ले जनाएको छ ।

विश्वकप छनोटमा नेपालले अहिलेसम्म एक खेलमा मात्र जित हासिल गरेको छ भने चार खेलमा पराजित भएको छ । समूह बी मा रहेको नेपाल तीन अंक जोड्दै चौथो स्थानमा छ । सोही समूहमा रहेको चाइनीज ताइपेइ अङ्कबिहीन छ ।

समूहको शीर्ष स्थानमा १२ अंकका साथ अस्ट्रेलिया छ भने दोस्रो स्थानमा १० अंकसहित कुवेत रहेको छ । यस्तै १० अंकका साथ जोर्डन तेस्रो स्थानमा छ । विश्व फुटबल महासंघ (फिफा)को बरियतामा अष्ट्रेलिया ४१औं स्थानमा, जोर्डन ९५औं, चाइनिज ताइपेइ १४१औं तथा नेपाल १७१औं स्थानमा छ ।

विश्वकप छनोट र एसियन कप छनोटका लागि राष्ट्रिय टोलीका प्रशिक्षक अब्दुल्लाह अल्मुताइरीले २३ खेलाडी छनोट गरेका हुन् । नेपाली टोलीको गोलरक्षकमा किरण चेम्जोङ, विशाल सुनार र दीप कार्की रहेका छन् ।

यसैगरी, डिफेन्डरमा रोहित चन्द, अनन्त तामाङ, दिनेश राजवंशी, गौतम श्रेष्ठ, सुमन अर्याल र विकास खवास रहँदा मिडफिल्डरमा विशाल राई, मनिष डाँगी, एरिक विष्ट, कमल थापा, सन्तोष तामाङ, सुमन लामा, सुनिल बल, सुरजजिउ ठकुरी, पुजन उपरकोटी र आयुष घलान छन् ।

फरवार्डमा भने अभिषेक रिजाल, अन्जन विष्ट, नवयुग श्रेष्ठ र आशिष लामा रहेका छन् ।