बेनी नगरपालिकाको निती, कार्यक्रम तथा बजेट सार्वजनिक

बेनी नगरपालिकाले आर्थिक बर्ष ०७८/०७९ को निती तथा कार्यक्रम र बजेट सार्वजनिक गरेको छ ।
बेनी नगरपालिकाको विहिवार आयोजित नवौं नगरसभामा उपमेयर सन्जु बरुवालले ६६ करोड ५ लाख ६७ हजारको आयब्ययको अनुमान सार्वजनिक गरेकी हुन । सार्वजनिक गरिएको बजेटमा बेनी नगरपालिकाको चालु तर्फ ४२ करोड ७८ लाख ८२ हजार र पुँजीगत तर्फ २३ करोड २६ लाख ८५ हजार बजेट विनियोजन गरिएको छ ।
सार्वजनिक बजेटमा आर्थिक विकासका कार्यक्रम सञ्चालन गर्न १ करोड ४० लाख, सामाजिक कार्यक्रममा १ करोड ७५ लाख, पूर्वाधार कार्यक्रम संञ्चालन गर्न ३ करोड ५० लाख, वातावरण तथा विपद ब्यवस्थापनमा ७५ लाख, संस्थागत एवं शुसासन तर्फ ३० लाख विनियोजन गरिएको छ ।
बेनी नगरपालिकाका जनप्रतिनिधीले कार्यकालको अन्तिम बजेटलाई चुनावी बजेटको स्वरुप दिन वडागत रुपमा एकमुष्ठ विनियोजन गरेको छ । सो अनुसार १, ४, ६ र १० वडालाई ६५/६५ लाख, ७ र ८ वडालाई ६०/६० लाख र २, ३, ५ र ९ वडालाई ७०/७० लाख बजेट विनियोजन गरिएको छ ।
बजेटमा कोरोना ब्यवस्थापन गर्न ५० लाख र मनसुनजन्य गतिविधीबाट क्षतिग्रस्त सडक मर्मत गर्न ७० लाख तथा विविध कार्यक्रम संञ्चालन गर्न ३ करोड ८५ हजार विनियोजन गरिएको छ ।
नगरसभामा मेयर हरीकुमार श्रेष्ठले आव ०७८/०७९ को ८ वुंदे निती तथा कार्यक्रम प्रस्तुत गरेका थिए । नगरसभा सदस्यहरुलाई नीति तथा कार्यक्रम र बजेट अध्ययनपछि असार १३ गते निर्णयार्थ पेश हुने गरी स्थगित गरिएको प्रमुख प्रशासकीय अधिकृत छविलाल सुवेदीले भने, ‘नीति तथा कार्यक्रम र बजेटमा सशोधन गर्नु पर्ने भए नगरसभा सदस्यहरुले अध्ययन गर्न र अन्य सरोकारवालाई पनि सुझाव दिन सजिलोकालागी समय दिईएको हो । सामान्यता बजेटको यो प्रकृया पनि हो ।’
अन्तर सरकारी वित्तिय व्यवस्थापन ऐन–२०७४ को दफा २१ ले सवै स्थानीय सरकारहरुले असार १० गते भित्र आफ्ना नीति तथा कार्यक्रम र बजेट सार्वजनिक गर्नु पर्ने ब्यवस्था गरेको छ ।