कोरोना लक्षण देखिएका म्याग्दीमा अर्का युवाको मृत्यु

म्याग्दीमा कोरोना लक्षण देखिएका एक युवाको विहिवार विहान २ बजे मृत्यु भएको छ ।
बेनी नगरपालिका, १ घर भै सदरमुकाम बेनीको कालीपुल स्थित एक होटलमा कार्यरत २२ बर्षिय युवाको विहिवार विहान २ बजे उपचारक्रममा धौलागिरी अञ्चल अस्पताल बाग्लुङ्गमा मृत्यु भएको जिल्ला कोभिड संकट ब्यवस्थापन केन्द्रका सदस्य सुरत केसीले बताए ।
थापालाई स्वासप्रस्वासमा समस्या भएपछि बेनी अस्पताल पुर्‍याईएको र त्यहाँ भेन्टीलेटरमा राख्न नसकिएपछि जिल्ला कोभिड संकट ब्यवस्थापन केन्द्रमा रेडक्रस प्रतिनिधी सदस्य सुरत केसी आफैले राती १२ बजे बाग्लुङ पुर्‍याएका थिए ।
‘बेनीमा थप उपचार नहुने भएपछि मैले नै उनलाई बाग्लुङ्ग अस्पताल पुर्‍याएको हो । उनको उपचारक्रम मै मृत्यु भएको थियो’ सुरत केसीले भने, ‘कोरोना संक्रमण जो कसैलाई हुन सक्छ । टोलछिमेकका विरामीलाई स्वास्थ्य सुरक्षा अपनाएर सहयोग गरौं, रमिते नबनौं ।’
कोरानो संक्रमणको संख्या बृद्धीसँगै मृत्यु हुनेको संख्या पनि बढेको छ । बैशाखमा मात्र ३ जना जिल्लावासीको उपचारक्रममा कोरोनाबाट मृत्यु भएको छ ।