एमाले केन्द्रीय कार्यालय थापाथली हाइट सर्दै

नेकपा एमालेकाे केन्द्रीय कार्यालय  थापाथलीमा सर्ने भएको छ। धुम्बाराहीस्थित पासाङहाल्मु स्मृति प्रतिष्ठान केन्द्रीय कार्यालय रहेको एमाले मुख्यालयलाई थापाथली हाइटस्थित उमंगमार्गमा सारिन लागिएको हो।

हाल केन्द्रीय कार्यालय रहेकाे प्रतिष्ठान खाली गर्न भनिएपछि एमालेले आफ्नाे कार्यालय सार्न लागेकाे हाे ।

लामाे समयकाे खाेजपछि उमंगमार्गस्थित पहिला युएन कार्यालय रहेकाे घर फेला परेकाे एक एमाले नेताले जानकारी दिए । उनका अनुसार बुधवार कार्यालय सार्ने मिति टुंगाे लाग्नेछ भने सम्झाैता पनि हुनेछ ।

पार्टीको कार्यालय सार्नेसम्बन्धी सबै कामको नेतृत्व उपमहासचिव विष्णु पौडेल र प्रधानमन्त्री ओलीका प्रमुख राजनीतिक सल्लाहकार विष्णु रिमालले गरिरहेका छन् ।

२०७२ सालको भूकम्पमा बल्खुस्थित पार्टीको भवन भत्किएपछि २०७२ साल साउन २३ गतेदेखि पार्टी कार्यालय धुम्बाराहीमा सारिएको थियो।

थापाथली हाइटस्थित अब केन्द्रीय कार्यालय रहने भवन ३ राेपनीभन्दा ठूलाे क्षेत्रफलमा फैलिएकाे ती नेताले बताए  ।