निष्ठाको राजनिती गरेका वौद्धिक नेता खड्काको निधन

नेपाली काँग्रेस म्याग्दीका पूर्व सभापति डाक्टर भुपेन्द्रबहादुर खड्काको ८० बर्षको उमेरमा निधन भएको छ ।
बेनी नगरपालिका, ७ संगमचोक निवासी डा. खड्काको मंगलवार विहान काठमाण्डौ छाउनी स्थित सैनिक अस्पतालमा उपचारक्रममा मृत्यु भएको हो । मुटु रोगको औषधी नियमित सेवन गरिरहेका डा खड्का आईतवार विहान अकस्मात विरामी भएपछि हेलिकोप्टरबाट अस्पताल पुर्‍याईएको थियो ।
साविक अथुङ्गे गाउँपञ्चायतको २ पटक प्रधानपञ्च भएको खड्का २०३६ सालको जनमत संग्रहदेखी खुलेर काँग्रेसको राजतिनीमा सकृय भएका थिए । २०३६ सालको फागुनमा काँग्रेस नेता गणेशमान सिंह म्याग्दी आई डा. खड्काको घरमा बास बसेपछि पञ्चायत समर्थकहरुले उनको घरमा आक्रमण गरेका थिए । ०३७ सालमा डा. खड्का, पत्नी मनोरमा मल्ल खड्का समेतलाई सार्वजनिक अपराधका मुद्धा लगाई केही समय थुनामा राखिएको थियो ।
पञ्चायत कालमा जनपक्षिय उम्मेदवारको रुपमा २०४३ सालमा राष्ट्रिय पञ्चायत र बहुदलपछि ०४८ सालमा काँग्रेसबाट प्रतिनिधी सभा सदस्यमा चुनाव लडेपनि विजय प्राप्त गर्न सकेनन । डा. भुपेन्द्रबहादुर खड्कालाइ काँग्रेसजनले मात्र जिल्लामा निष्ठाको राजनिती गर्ने वौद्धिक, शालिन नेताको रुपमा गनिन्थे ।
डा खड्का नेपाली काँग्रेस म्याग्दीको ०५७ मंसिर १३ को तेस्रो र २०६१ साल माघ २७ गतेसम्पन्न चौंथो अधिवेशनबाट गरी दुई कार्यकाल निर्विरोध सभापति निर्वाचित भएका थिए । म्याग्दी काँग्रेसले खड्कालाई वरिष्ठ नेताको रुपमा सम्मान गर्दै आएको थियो ।
बाग्लुङ बजारमा विस १९९८ साल साउन २० गते जन्मेका खड्काको प्रारम्भीक शिक्षा बाग्लुङ वजारस्थित विद्यामन्दीर हाई स्कुलबाट सुरु भएको हो । खड्काले भारतको हलकत्ता विश्वविद्यालयबाट डिएमएस, विए, विएलसम्मको अध्ययन गरेका थिए ।
युवा अवस्थामा अविवाहित रहँदै खड्काले २०२२ सालमा पुख्यौली थलो छोडेर म्याग्दी सदरमुकाम रहेको बेनी बजारमा बसाई सराई गरेका थिए । खड्काको विवाह भने पर्वतको माझफाँट मल्लाजका मल्ल ठकुरी परिवारकी मनोरमा मल्लसँग भएको थियो । खड्काका एक छोरा एक छोरी छन । छोरा हिंमाशु खड्का नेपाली सेनामा सहायक रथी पदमा कार्यरत छन ।
२०२५ सालदेखी हालकै बेनीको संगमचोक स्थित घरमा औषधी पसल ‘फार्मेसी’ तथा कानुनी सेवा ‘ल फर्म’ खोलेर चिकित्सा सेवा र कानुनी सेवा सँगसँगै चलाएका थिए । डा. खड्का साहित्यप्रेमी पनि थिए । खड्काकै अगुवाईमा २०२५ सालमा बेनीमा म्याग्दी पुस्तकालय स्थापना भएको थियो । पुस्तकालय मार्फत विभिन्न साहित्यीक कृतिहरु प्रकाशत भएका थिए । त्यसवाहेक जिल्लामै उच्च शिक्षा प्रदान गर्ने पहिलो म्याग्दी क्याम्पस स्थापना गर्नेमध्यका एक थिए । खड्का म्याग्दी क्याम्पस संञ्चालक समितिमा पनि लामो समय नेतृत्व गरेका थिए ।