घारको सामुदायिक वनमा भिषण डढेलो, नियन्त्रण बाहिर

२ फाल्गुन २०७७, आईतवार २१:३७ मा प्रकाशित (2 हप्ता अघि)
पुनहिल संवाददाता

अन्नपूर्ण संरक्षण क्षेत्र आयोजना (एक्याप) अन्र्तगत पर्ने अन्नपूर्ण गाउँपालिका, ६ घारको सामुदायीक वनमा दुई दिनदेखी लागेको भिषण डढेलो नियन्त्रण बाहिर छ ।
शनिवार अन्नपूर्ण गापा, ७ घराम्दीको लामेला क्षेत्रबाट लागेको डढेलो आरुवोटबाट तलतल सर्दै महभीरबाट जेकेपानी, खोपको जंगलबाट गुर्काहाल्नेभी भीरबाट वायाचारहुँदै गौडाखर्कको जंगलतर्फ फैलिरहेको छ । हालसम्म सयौं हेक्टर संरक्षित वन नष्ट भएसँगै वन्य जन्तुको वासस्थान नष्ट भएको छ ।
नेपाली सेना समेत स्थानीय समुदायले शनिवारदेखी डढेलो नियन्त्रणमा खटिएका भएपनि प्रयास सफल नभएको स्थानीय मेख खड्काले बताए । लामो सयमदेखीको खडेरीले गर्दा एक्याप क्षेत्रको संरक्षित वनमा मंसिर अन्तीम सातादेखी लगातार डढेलो लाग्न थालेको छ ।
केही समय अघि एक्याप अन्र्तगतकै निलगिरी साउथ हिमालको पूर्वी फेदीमा रहेको संरक्षित राष्ट्रिय वनमा र पर्यटकीय गन्तब्य पुनहिल–घान्द्रुक क्षेत्रमा एक सातावढी भिषण डढेलो लागेको थियो ।
एक्यापको ब्यवस्थापन कमजोर र खुकुलो बन्दै गएसँगै एक्याप क्षेत्रमा चोरी शिकार बढ्नुको साथै वन डढेलो समेतका वन एवं वन्यजन्तु संरक्षणका काम प्रभावहीन वन्न थालेका छन ।