म्याग्दीमा स्वास्थ्यकर्मी, बृद्धबृद्धा र कैदीवन्दी समेत ८ सय ९४ जनाले लगाए कोरोना विरुद्धको खोप

जिल्लामा कोरोना भाईरस संक्रमण रोकथाम, नियन्त्रण र उपचारमा अग्रस्थानमा जुटेका स्वास्थ्यकर्मी, महिला स्वयं सेविका समेत ८ सय ९४ जनालाई कोरोना विरुद्धको खोप लगाईएको छ ।
स्वास्थ्य कार्यालयका प्रमुख एक नारायण लम्साललका अनुसार बेनी नगरपालिका, ९ गलेश्वर स्थित बृद्धाश्रममा रहेका ५६ जना बृद्धबृद्धा, कारागार कार्यालय बेनीमा रहेका १ सय १८ जना कैदीवन्दीलाई पनि पहिलो चरणको कोरोना विरुद्धको खोप लगाईएको छ । जिल्लामा कोरोन विरुद्धको खोप लगाएका कसैलाई पनि तत्काल कुनै साईड इफेक्ट देखिएन ।
स्वास्थ्य कार्यालयका अनुसार लक्षित जनसंख्यामा समावेश ८६ जना गर्भवती र वच्चालाई स्तनपान गराई रहेका स्वास्थ्यकर्मी तथा महिला स्वयं सेविकालाई भने कोरोना विरुद्धको खोप लगाईएन ।
कोरोना विरुद्धको खोप लगाउन जिल्लाको सवै भन्दा दुर्गम धवलागिरी गाउँपालिका, १ गुर्जाबाट दुई दिन हिंडेरै स्वास्थ्यकर्मी तथा महिला स्वयंसेविकाहरु सदरमुकाम आएका थिए ।
‘कोरोना महामारीको विच घर घर गएर सेवा दिनु पर्दा जोखिम थियो । कोरोना विरुद्धको खोप लगाएपछि सुरक्षित महशुस भएको छ’ धवलागिरी गापा, १ गुर्जाकी महिला स्वयं सेविका विष्णुमायाँ छन्त्यालले भनिन, ‘आजभोली पहिलो जस्तो कोरोना सचेतना छैन । कसैले पनि स्वास्थ्य साविधानी नअपनाउने हुँदा कोरोनाको त्रास पनि उच्च छ ।’