कोरोना भाइरसको महामारी थप फैलिन नदिन भन्दै भारतका विभिन्न राज्यमा कर्फ्यू जारी गरिएको छ । दक्षिण पश्चिमी राज्य कर्नाटकमा बुधबारदेखि जनवरी २ तारिखसम्म लागू हुनेगरी बुधबार नै कर्फ्यू आदेश जारी गरिएको छ कर्फ्यू रातको समयमा मात्रै लागू हुने भएको छ । राति १० बजेदेखि बिहान ६ बजेसम्म मात्रै लागू हुनेगरी कर्फ्यू आदेश जारी गरिएको अधिकारीहरूले जनाएका छन् ।
यसअघि भारतकै महाराष्ट्र राज्यले पनि सातघण्टे कर्फ्यू आदेश जारी गरेको केही दिनपछि कर्नाटक राज्यले ८ घण्टे कर्फ्यू लगाएको हो । महाराष्ट्रमा राति ११ बजेदेखि बिहान ६ बजेसम्म कर्फ्यू आदेश जारी गरिएको छ । महाराष्ट्रमा जनवरी ५ सम्मका लागि कर्फ्यू लगाइएको अधिकारीहरूले जनाएका छन् ।
नयाँ वर्ष २०२१ र क्रिसमसका अवसरमा भीडभाड र चलहलपहल बढेर महामारी थप फैलिन सक्ने खतरालाई मध्यनजर गर्दै कर्फ्यू आदेश जारी गरिएको आदेशमा उल्लेख गरिएको छ । कर्नाटकका स्वास्थ्यमन्त्री डा. के सुधाकरले डिसेम्बर २३ देखि जनवरी २ सम्म रातिको समयमा बाहिर निस्कने, हिँडडुल गर्ने वा भीडभाड गर्ने कुनै पनि गतिविधि नगर्न सबैलाई आह्वान गरे ।
चाडपर्वसम्बन्धी गतिविधि विषेश गरेर रातिको समयमा धेरै हुने भएकाले रात्रिकालीन कर्फ्यू लगाइएको अधिकारीहरूको भनाइ छ । भारतको कर्नाटकमा मात्रै अहिलेसम्म कोरोनाभाइरसका कारण १२ हजार २९ जनाको मृत्यु भएको छ भने कुल १४ हजार १४ जना अझै पनि संक्रमित अवस्थामै रहेका छन् । श्रोत : एजेन्सीहरु
पुनहिल संवाददाता
