सेतो रिबन अभियान

१० मंसिर २०७७, बुधबार २०:३३ मा प्रकाशित (2 महिना अघि)
पुनहिल संवाददाता

महिला तथा बालिका विरुद्धका हिंसा कहिले गर्नु गर्नुहुँदैन, महिला तथा बालवालिकाका विरुद्धका हिंसाको कहिले उपेक्षा गर्नुहुँदैन र हिंसा खपेर बस्न हुँदैन भन्ने उद्धेश्यका साथ सेतो रिबनको अभियान सुरु भएको हो ।

सेतो रिबन अभियान पुरुषवर्गबाट महिला एवं बालिकाहरु प्रति हुने हिंसाको विरुद्धमा पुरुष र युवाहरुद्वारा आफ्नो व्यक्तिगत रुपमा वा संस्थागत रुपमा गरिने प्रतिवद्धताको अभियान हो । यसको सुरुवात महिला तथा वालिकाका विरुद्ध भइरहेको हिंसाको बारेमा बोल्ने जिम्मेवार पुरुषवर्गले लिनुपर्दछ भन्ने बिचारबाट सन् १९९१ मा क्यानडाका केहि पुरुषबाट सुरु भएको थियो । क्यानडामा सानो तयारी पछि गरिएको यस कार्यक्रमबाट लाखौं पुरुषहरुले सेतो रिबन लगाएर प्रतिबद्धता जनाएका थिए । सेतो रिबन लगाउनु भनेको पुरुषबाट महिला तथा बालिकामाथि गरिने हिंसाको विरुद्ध पुरुष वर्गबाटै देखाएका प्रतिबद्धताको संकेत हो ।
यो अभियान देश अनुसार फरक फरक ढंग र समयमा मनाइने भएता पनि हरेक बर्ष लैंगिक हिंसा विरुद्धको १६ दिने अभियानमा अझ विशेष रुपमा मनाउने गरिन्छ । हाम्रो देशमा सन् २००६ देखि अन्तराष्ट्रिय नारी दिवस अर्थात मार्च ८ मा सेतो रिबन अभियान सुरु गरिएको थियो ।

अन्त्यमा, आजको २१ औं शताब्दिको ज्ञान–विज्ञानको युग, सुचना प्रविधि र सामाजिक संजालको अधिकतम् प्रयोग भएको समय, राष्ट्रमा महिलाले उचतम् पदमा आसिन भएको अवस्था छ । अझै पनि ग्रामिण भेगका महिलाहरु, ठूला कुलघरानाका महिलाहरु जो इज्जत जाने डरले बाहिर कुरा निकाल्न नसकिरहेका, शहरबजारमा बसेर पनि शिक्षाको पहुँचबाट टाढा भएका महिला तथा बालिकाहरु बढी पिडित देखिन्छन् । धन र घमण्डले भरीपूर्ण भई संस्कार नपाएकाहरु, शिक्षित भनाउँदाहरु अर्थात ठूलोठालु हुँ भन्नेहरु, राजनैतिकरुपमा सत्ताको आड पाएका मतियारहरु, नियमित मादक पदार्थ सेवनकर्ताहरु अर्थात नसाको कुलतमा फसेकाहरु, म एक आमाबाट जन्मेको पुरुष हो भन्ने ज्ञान नभएका बिवेकहिनहरुबाट घरपरिवार भित्र वा बाहिर महिलाहरु हिंसाको शिकार हुनपरेको तितो यथार्थ हामीसमक्ष यथेस्ट छन् ।
महिला हिंसा विरुद्धका प्रयासहरु नभएका होइनन् तर सार्थक प्रयासको खाँचो टड्कारो रुपमा खड्किएको छ । आजको दिन बिशेष छ, आफ्नी आमा, श्रीमती, दिदिबहिनी, छोरी–चेली, नन्द–भाउजु–बुहारी सबैलाई हिंसाबाट बचाऔं । हामी सबै मिलेर महिला हिंसा सदासर्वदा अन्त्यको लागि साझा प्रण गरौं ।