पुनहिल संवाददाता
प्रतिनिधिसभाका सांसद नै सञ्चालक रहेको निर्माण कम्पनीले समयमै काम नसक्दा सडक कालोपत्र योजना अलपत्र परेको छ । सांसद जिपछिरिङ लामा सञ्चालक रहेको लामा कन्स्ट्रक्सन र अच्युत खरेल सञ्चालक रहेको समानान्तर कन्स्ट्रक्सनको ढिलासुस्तीले बेनी–दरवाङ सडक स्तरोन्नतिसहित कालोपत्र हुन नसकेको हो ।
ठेकदारा कम्पनीको चरम लार्परवाही र नियमन गर्नु पर्ने निकाय पूर्वाधार विकास कार्यालयको रहस्यमय मौनताको कारण पश्चिम म्याग्दीको लाईफ लाईन मानिएको बेनी–दरवाङ सडकको पहिलो खण्ड नै कालोपत्रे अलपत्र अलपत्र पर्दा यो सडक किनाराका हजारौं रोपनी उर्वर खेतीयोग्य जग्गा पहिरोमा बगेको छ । वस्ती जोखिममा परेका छन । सयौं जना विस्थापित भएका छन ।
ती कम्पनीले साढे १२ किलोमिटर सडक कालोपत्र गर्ने ठेक्का संयुक्त रूपमा पाएका थिए । ०७६ माघ ४ गतेभित्र सम्पन्न गर्नुपर्ने योजना पूरा नभएपछि ०७७ असोज मसान्तसम्म सक्ने गरी म्याद थपिएको थियो । योजना नियामक पूर्वाधार विकास कार्यालय बेनीका अनुसार हालसम्म योजनाको भौतिक प्रगति ४० प्रतिशत हाराहारी मात्र छ । कम्पनीले कार्यालयबाट ५ करोड ८० लाख पेस्कीबाहेक २२ करोड ३५ लाख रुपैयाँ भुक्तानी लगिसकेको छ ।
‘ठेकेदारलाई काममा फर्काउन चारवटा पत्र लेख्यौं । टेलिफोनमा थुप्रै आग्रह गर्यौं तर बेवास्ता गर्दै आएका छन् । पत्रको रेस्पोन्स नै गरेको छैन,’ जिल्ला प्रशासन कार्यालयमा हालै सम्पन्न कार्यालय प्रमुखहरूको बैठकमा पूर्वाधार विकास कार्यालय प्रमुख नवराज पौडेलले भने, ‘ठेकेदार परिचालन नहुँदा हामीमाथि पनि प्रश्न उठेको छ । अब धरौटी जफत गरी कालोसूचीमा राखेर ठेक्का तोड्नुपर्ने अवस्था आएको छ ।’
पर्याप्त बजेट विनियोजन नभएकाले समयमै काम गर्न नसकेको निर्माण कम्पनीले बताउँदै आएको छ । ‘दुई वर्ष संघ र प्रदेश सरकारको खिचातानीले बजेटै परेन,’ समानान्तरका सञ्चालक खरेलले भने, ‘दुई वर्षअघि गरेको कामको तीन करोड भुक्तानी दुई वर्षपछि पायौं । कसरी काम समयमा हुन्छ ?’ तर कार्यस्थलमा एक जना मजदुर परिचालन नभएकाले ठेकेदार कम्पनीले बहानाबाजी गरेको सरोकारवालाले बताएका छन् । सडक चाक्लो पार्ने र ड्रेन बनाउनेसमेतका कामै भएको छैन । ठेकेदारले सडक चौडा पार्न भित्तामा लगाएको ग्याभिन जाली झिकेर फालेको तर नयाँ संरक्षणका काम नगर्दा गत बर्खामा भित्ता पुरै बगेर सडक तहसनहस भएको छ ।
