म्याग्दीका सवै गाउँपालिकामा कोरोना अस्पताल बन्दै, डाक्टर नियुक्त गर्न आवेदन माग

जिल्लाका सवै गाउँपालिकाहरुमा अस्थाई कोरोना अस्पताल बनाउन प्रकृया थालेका छन ।

स्वास्थ्य तथा जनसंख्या मन्त्रालयले भविश्यमा समुदाय स्तरमा कोरोना संक्रमण भयावह हुने आकलन गरी स्थानीय तहमा ५ बेड क्षमताको कोडिभन–१९ अस्थाई अस्पताल बनाउन गाउँपालिकाहरुलाई  आवश्यक बजेट निकासा दिएको छ । मन्त्रालयले १० लाख मध्य ५ लाखको वेडसमेत आवश्यक स्वास्थ्य सामाग्री र ५ लाखबाट एक जना मेडिकल अफिसर (डाक्टर), एक जना स्टार्फ नर्स र एक जना कार्यालय सहयोगीसमेत ४ जना श्वास्थ्यकर्मी नियुक्त गर्न निर्देशिका अनुसार जिल्लाका सवै गाउँपालिकाहरुले अस्थाई कोरोना अस्पताल निर्माण प्रकृया थालेका हुन ।

मंगला गाउँपालिकाले अन्य स्थानीय तहले भन्दा छिटो ५ बेड क्षमताको अस्थाई कोरोना अस्पतालकालागी पूर्वाधार तयार पारेको जनाएको छ । मंगला गापाले अर्मन हेल्थपोष्टको एउटा खण्डमा ओपिडि सेवा प्रभावित नहुनेगरी ५ बेड, २ अक्सीजन सिलिण्डर सहित कोरोना अस्थाई अस्पतालको पूर्वाधार तयार पारेको हो ।

मंगला गापाका प्रमुख प्रशासकीय अधिकृत मनोहर ढुङ्गानाका अनुसार निर्देशिका अनुसार कोभिड–१९ अस्थाई अस्पताल संञ्चालन गर्न कात्तितक ५ गतेको मितिमा डाक्टरसमेत स्वास्थ्यकर्मी नियुक्त गर्न दरखास्त आह्वान गरेको छ ।

‘अर्मन हेल्थपोष्टमा ५ बेडसहित अस्थाई कोरोना अस्पतालको पूर्वाधार तयार पारेका छौं । हेल्थपोष्टमा उपलब्ध २ वटा अक्सिजन सिलिण्डरलाई पनी कोरोना अस्पतालमा प्रयोग गर्ने गरी ब्यवस्था मिलाएका छौं’ मंगला गापा अध्यक्ष सतप्रसाद रोकाले भने, ‘कोरोना अस्पतालमा घरमा छुट्टै आईसोलेसन बनाउन नसक्ने विरामी, मजदुर र अति विपन्नलाई मात्र राख्ने योजना छ ।’

बेनी नगरपालिका बाहेक अन्नपूर्ण गाउँपालिकाले वडा नं ५ नारच्याङमा नेपाली सेनाले प्रयोग गरेको भवन, रघुगंगा गाउँपालिकाले वडा नं ३ पिप्लेको स्वास्थ्यचौकी, मालिका गाउँपालिका दरबाङको छ्यारछ्यारे र धवलागिरी गाउँपालिकाले वडा नं ७ ताकममा बनाउने तयारीमा छन् ।

१० लाख रुपैंया बजेट मध्ये ४ लाख ५० हजार रुपैंया तलब, ५० हजार रुपैंयाँ औषधि र ५ लाख रुपैंयाँको बेडसहितका समाग्री किन्न गरी निर्देशिकामा उल्लेख छ । अस्थायी अस्पतालका लागि तत्काल ३ महिना करारमा जनशक्ती ब्यवस्थापन गरिने छ ।

त्यस्तै मालिका गाउँपालिका उपाध्यक्ष खरमायाँ विटालुका अनुसार मालिका गापामा अस्थाई कोरोना अस्पताल बनाउन औषधी, बेड र अन्य स्वास्थ्य सामाग्री खदिर गर्न थालिएको छ । स्वास्थ्यकर्मी नियुक्तिकालागी दरखास्थ आह्वान गरिए अनुसार स्थानीय दरवाङ प्राथमिक स्वास्थ्य केन्द्रका करारका डाक्टरलाई नै कोभिड अस्पतालमा पुन: नियुक्त गर्ने तयारी भएको छ । स्टार्फ नर्सहरु पनि सम्पर्कमा आउने क्रममा छन ।